طرح الشاعر السوهاجي الشاب مينا عوني قصيدته الجديدة”القواعد الفلسفية السبع” ولقيت ترحيب واسع بين أوساط الشباب من محبيه الذين يحرصوا على حضروا الأمسيات الشعر التي يقيمها والحفلات التي يشارك في أحيائها بإلقاء قصائده الشعرية التي تعرف بكثير من الإحساس، وننشر قصيدة القواعد الفلسفية السبع.
(النص)
” القواعد الفلسفية السبع “
وحدة قياس العُمر..موت وحدة قياس يأسك .. ندم وحدة قياس الثورة صوت وحدة قياس حجم السكوت ساعة الوجع هو الألم . وحدة قياس الحب مش بس الظروف وحدة قياس الشعر مش حبة حروف وحدة قياس الصدمه خوف وحدة قياس الإنتماء كلمة وطن . يا صبر مرهون بالأمل طعمك أمر من الدوا يا كل فكرة بتتقتل و يا حلم واخد فى الضلوع إبرة هوا، أنا برضه لسه مصدقك ..وانا وانت لسه مكملين طريقين هيتقاطعوا سوا.
كُفرك بالواقع مرض مبيتعالجش بـ أسبرين الوهم كان شىء وانقرض والحلم جرعة أنسولين بتحفّزك بس انت عافر دوّر فـ جوفك هتلاقيك حاول تكون باليأس كافر إياك تآمن إلا بيك .
خيط البكر بيكُر فـ أصبر على الأيام علشان تلاقى الخير وأصبر على اللى يصير إن حلو كان او مُر هتلاقى منهم ألف شىء يبان مجازاً فـ العلن بينرفزك هتلاقى برضه كام صديق رغم انه عايش بالجسد .. بيحفّزك .
سلّم سلام بارد على كل إيد فارقتك ببرود سلام إيدها ده البُعد شىء ثابت لكنه مش مرغوب عافر كتير جامد وإن كَت فـ يوم سكتك صعبه فـ أولها…راح تبقى آخرتها أبرح من المطلوب. إن كان طريقك آخره سد خد سكه تانيه توصّلك ماتسيبش حلمك يبقى زيف..وان كان آمانك يوم لحد كان حاجه كافيه تغيّرك يبقى انت اكيد انسان ضعيف..الليل نزيف. وانت الحمل داير تدوّر ع الحياه فـ نبته من ريح الأمل ! ،،قوم حرر روحك من ظلمك وانسج فـ خيوط واقع حلمك هتلاقى أكيد شىء يستاهل إنك تستنى ماتمشيش هتلاقى أكيد شىء يستاهل…إن أنت تعافر و تعيش.