جميع الأحداث الواردة بالمقال التالى من وحى خيالى …
وأى صلة لها بالواقع شىء متوقع لأن شخوص هذه القصة حقيقيون …والأحداث منطقية …!!!
المشهد الأول : أبى يجلس مع مجموعة من خاصته الذين يثق بهم فيأتيه أحدهم
– قائلا ” قوم ألحق بنتك اللى ربيتها وعلمتها وأديتها كل المسئوليات وخليت الناس تمشى وراها ” !!!!
– أبى : بنتى أنا !!! عملت إيه ؟؟؟؟
– صوت ١ : قبل ماتسأل عملت ايه ؟ تعالى افرجك كام حد بيسقف لها ؟ وبيمشى وراها ؟؟!! ينفع كده ؟؟؟
– أبى : ايوه …لكن هى عملت ايه ؟؟؟
– صوت ٢ ( وهو ذو مكانة اعلى لدى ابى والناس ) : برضه بيقول عملت ايه !!! ياعم قوم خد موقف الاول وبعدين نشوف عملت ايه ؟؟؟ طب ده انا سامع انها لخبطت فيك !! وفينا !!! وقالت كلام مايصحش يتقال !!!
– صوت ١ ( بقدر اكبر من الحماسة ، فقد بدى أبى مشحونا بالموقف وبدا ان له مؤيدون ف الجلسة ) : ياريتها وبس جت على كده …ده انا بقى سمعت من كذا واحد ان الموضوع ده وراه ناس بتخطط له …دول عاوزين منك ايه ! عاوزين مننا ايه !! مايسيبونا ف حالنا …مش مكفيهم الخير اللى هم فيه من ورانا …ده بدل كلمة شكرا !!!!!
– أبى ( يتغير وجهه وبمشاعر الأب الذى يتوقع من ابنائه ان يشرفوه …يشعر بالخجل مما يقوله ” المقربون ” عنى )
– صوت ٢: يعنى ماردتش …ولا قلت حاجة ولا عملت حاجة …ايه مش مصدقنا ولا إيه ؟
– أبى ( صامت )
– صوت ١ ( يبدأ فى التوحش وصوته يعلو فقد شعر انه انتصر فى معركته ” قالولى ” ) : لاااا ده واضح انها سابت …ماكانش ده أملنا فيك !!!!
– أبى : ….،دى بنتى !!!!! انا بنتى ماتعملش كده !!!!
————————–
المشهد الثانى :
– أبى ( غاضبا ) يستدعينى على الفور …
– أنا : نعم يابابا …أنا سعيدة جدا انك طلبتنى ..من زمان ماشفتكش ..مقدرة مشغولياتك وواصلانى محبتك فمابحبش أزعجك ..
– أبى : وانا متابعك وشايف تصرفاتك وعاوزة اتطمن عليكى …
– أنا : الحقيقة يابابا …انا نفسى اعمل كذا وكذا …ونفسى اطور كذا وكذا ..وتعبانة من كذا وكذا …
– أبى ( مقاطعا ) : انت صحيح زى ما بيقولوا ……..
– انا : انا !!!! مستحيل اعمل كده يابابا !!! آه يمكن لما شافونى باقول تعبت …فهموا غلط ! ولما شافونى باقول حلمت ..فهموا غلط ..ولما شافونى باقول أطور ..فهموا غلط !!!
– أبى : طب احكيلى عاوزة ايه ..وبتحلمى بايه واساعدك ازاى …
– انا : انت احلى أب …
– أبى : اسمعينى يابنتى …أحلامك ماتخليهاش تأخدك بره السكة ، ومتابعك ماتخليهاش تكسرك ولا توقعك ، واللى نفسك تطوريه عيشيه …بطلى كثر كلام ع الفاضى …كثر الكلام خيبة يابنتى !!
– أنا : أنا باعتذر …غلطت .
– أبى : انتى بنتى .
– أنا : أنا متشرفة انى بنتك …وانت رفعت راسى النهاردة ..بس الناس اللى حواليك مش بيحبونى !!!
– أبى : هما مش بيكرهوكى …انما بيحبونى انا غلط !!!
– انا : متشرفة انى بنتك …متشرفة انى بنتك ..عمرى ماهاعمل حاجة تخليك خجلان …
متشرفة انى بنتك .
————– انتهى ———–