تمام يا فندم ..
بالنسبة لكل الأقباط ..
جارى الحذف من الكشوفات
جارى حركة الاغتيالات..
باسم الدين والاحتكاكات
تمام يا فندم ..
بالنسبة لكل الأقباط ..
جارى الحذف من الكشوفات
جارى حركة الاغتيالات..
باسم الدين والاحتكاكات
تمام يا فندم..
جارى قراءة خبر الآن..
إن ساعدتك مش نعسان
ومتابع كل الأحداث..
ومطمّن قلب القلقان
وإنك جد حقيقى حزين..
أب لكـل المصريين
تمام يا فندم..
جارى تصوير رد الفعل..
وان الطوب محدوف من جوا
والكوردون الأمنى شديد..
وانها بس مجرد غُمــه
تمام يا فندم..
جارى استعداد القنوات..
وزّعـنا ع الفضائيات
كل كلام الاكلاشيهـات
وزعنا الجُمل المأثورة..
ع الحوارات
: ” التماسك والتلاصق
التعايش والتسامح ..
والتودد والتآخي
والمحبة والتراضي… “
أنت مشغول ولا فاضي أقول زيادة..
أصلى فالح فى اللاماضة ..
تمام يا فندم..
جارى تنويم العملية..
ونجاحها أكيد ميه الميه
جارى تبرئة الداخلية ..
من كل التهم الحقيقية
تمام يا فندم..
جارى تكميم الأفواه..
جارى فبركة الحدوتة
جارى تسريب أى جُناة..
لبسنا ضميرهم “برمودة”
تمام يا فندم..
جارى تحضير الوطنية..
فى معامل التلفزيون
كام أغنية تلهب مشاعرهم..
على كام كلمة من مسئول
جارى هدم الانتماءات
جارى تفريغ الكلمات..من معانيها
تقدر تدخل الانتخابات..ونُؤكد لجلالة هيبتك
إن جماعتك هتفوز بيها
وبكده تبقى دى آخر خطوة
فى “النهضة” اللى بنحلم بيها !!