* * قالوا في الأمثال يا أبو العيال هاتلك شيال,طب الشيال يجيب مين يشيل معاه؟ ولما يكون الشيال شاب في بداية حياته!!!…بخيت إبراهيم شيال في سوق العبور 23سنة لا يحمل فقط طاولة السمك علي أكتافه لكنه يحمل معها همومه ومشاكله وأحلامه,فحقا كما قال مطرب الأغاني الشعبية: شيال الحمول يا صغير,فعندما يخرج عن صمته ويتحدث فله آراؤه واهتماماته وطموحاته فهو جزء لا يتجزأ من الشارع المصري…فيقول:
* بقالي حوالي 10سنين في سوق العبور.
* باشيل الطاولة الواحدة بجنيه ونص وعلي قد ما بقدر باشيل.
* دخلي ساعات بيبقي 5جنيه وساعات 20جنيه لكن ما اقدرش آخد مكان حد لإن فيه طابور كبير من الشيالين في سني وأكبر مني محتاج لرزق برضه.
* اليوم الواحد في السوق بيكلفني 5جنيه مواصلات وأكل,طب هاوفر كام؟!.
* بعد ما خلصت الجيش ورجعت السوق حسيت إني غريب وغيري خد مكاني وربنا يكفينا شر الافترا والذل وأديني بحاول أصبر.
* ياريت الحكومة تساعد الشباب بأي شغل خصوصا إللي بيقضوا فترة 3سنين زي حالاتي ودي فترة بتعطل الشاب عن حاجات كثير.
* مش معايا مؤهل عشان كدة أنا ضايع,كل شغلانة محترمة شوية بالنسبة لي أتقدم ليها يقولولي معاك إيه وبتقرا وتكتب ولا لأ.
* قدمت عامل شبكات في شركة اتصالات ورفضوني عشان المؤهل والعمالة الكثيرة إللي عندهم!!.
* أنا خاطب من 3سنين ومش عارف أتجوز بسبب مصاريف الجواز.
* مستعجل علي الجواز عشان مراتي بعد كده تساعد أمي المريضة.
* باصرف علي بيت أبويا خصوصا أن أبويا مقعد هو كمان ومريض بعد ما كان شغال علي النقل بالجمال في الصعيد ومالهوش معاش.
* في الأوقات إللي مافيهاش رزق باصرف من إللي محوشه علي أهلي وعلي خطيبتي وعلي نفسي.
* ماعرفش حد في البلد غير الريس مبارك.
* يعني إيه وزرا ولا غفرا؟ بيعملوا إيه دول…يعني هيخلوني أشتغل وأكسب…ولا هيرجعولي الزمن أتعلم وأتنور؟!!.
* إحنا الشباب محتاجين لقمة حلوة عشان نقدر علي الشغل لكن هانعمل إيه واللحمة بقي سعرها في الخيال أهو كفاية شوية السمك إللي بناخدهم من المعلمين إللي عندهم ضمير ولو كل شهر مرة.
* باشوف شباب في سني مرتاحين…لكن كل واحد بياخد نصيبه.
* نفسي ألاقي شغلانة ثانية وأتجوز.
* لو قابلت الريس هقوله إحنا تعبانين قوي يا ريس وأملنا في ربنا وفيك تظبط الشعب الغلبان إللي زي حلاتنا.