تداول نشطاء موقع التواصل الاجتماعي “فيس بوك”، صورًا لمُشرد متواجد بمحافظة طنطا.
فقد عرضت صفحة بروفايل قصته تحت عنوان “متسول في طنطا حصل على اعلي الشهادات ويجيد ثلاث لغات إيطالي إنجليزي فرنساوي و بيعلم الناس في الشارع بعد أن شرده الوطن”.
وقد تفاعل الكثير من النشطاء سواء بالمشاركة أو التعليق حول قصته، فقال عمر مستنكرًا للرواية :”و الله العظيم ده لو يعني بيفكر كويس وراح أي شركة أو فندق أو مصنع لهيشتغل بأقل حاجه 3 ألف جنيه متعلقش كل حاجة ع البلد.. ممكن نقول ربنا يتولاه ويشفيه بس وأنت متعرفش حياته الشخصية حصل فيها إيه”.
بينما هند فروت حكاية أخرى :”غلط الكلام ده في ناس قالت إنه قبطان.. وناس قالت إنه كان مدرس و إن اللي حصله ده بسبب صدمه نفسية مش شرده الوطن و لا حاجة.. محتاج بس حد يساعده و يقف جنبه و يفهم اتعرض لإيه”.
وعرفت هند نفسها قائلة :”أنتم صفحات كبيرة مينفعش تنقلوا أي حاجة لمجرد أنها متداولة..خاصة أننا من متابعينكوا .. صحفيه مصرية”.
كما استنكر أمير اتهام الوطن ، قائلًا :”كلنا بنبص للصورة وبنحكم عليه ليه وبنقول شرده وطن.. هو أنت كنت دخلت أعماق حياته مش ممكن اتصدم في حاجة في حياته يعني بالعربي هو مريض نفسي و محتاج علاج مفيش حد عارف ظروفه إيه بلاش و النبي ناخد الناس بالمظاهر ونحكم عليه وندخل دولة و أوطان في حالته واللي هو فيه”.
وكان لنودي رأي آخر :”مش مهم السبب اللي وصله لكده سوء كان اتشرد بسبب وطنه أو لأي سبب تاني المهم أن في النهاية وصل للحالة دي إحنا ليه بقينا كده بننسى الموضوع الأساسي و نبدأ نبدع في الإشاعات هو ده طبع المصرين فعلا”.
وأصرت بانتو على اتهام الوطن، فقالت :”يا جماعة بالنسبة للناس اللي بتقول أن شغل كتير في مصر.. يمكن إحنا ف مصر تانية.. وإحنا مش واخدين بالنا.. لو عندكم شغل معظمنا خريج كليات”.
وكان لمحمد رد فعل إيجابي آخر، فقال :”طيب يا ريت يا جماعة حد يعرفنا الراجل دا موجود فين في طنطا بالتحديد وإن شاء الله نقدر نقدم مساعدة”.
وهاجم محمد من قام بتصويره :”واللي صوره حب يجمع بيه لايكات بس.. بدل ما يحاول أنه يجمع فلوس ويساعده وتخلي الناس تساعده”.
وحللت مليكة شخصيته :”هاد مو متسول هاد فقد جزء من عقلو من كثرة الدراسة والذكاء عنا نموذج منو هون ببلادنا..لأنه لو مش فاقد عقلو كان اشتغل بعلمو ولغته بأحسن الأماكن”.
وطلب كريم أيوعمره من الذين يعرفونه أن:”كل اللي بيعلقوا وبيقولوا عرفينه يا ريت تعملو حملة في منطقتكم بجمع التبرعات ليه علشان يتعالج أو ابعتوا صوت جماعي بتوقيع لمسئول ديرتكم يتكفل بيه أحسن من التعليق”.
وأكد خالد أنه :”أنا عارف الراجل ده بشوفه ع طول و ساعات بلاقيه ف شارع البحر كتير ف أول البحر كده و بينام ف الشارع يَعيني”.
وكان لسعد رأي آخر :”الراجل ده و ربنا شوفته انهارده الصبح وأنا رايح الشغل على كوبري غمرة في القاهرة.. وكان بيكتب على الأرض زي كده”.
وأوضح محمد أن :”الراجل ده لف مصر كلها وبيقول كلام كبير أوي أنا شفته في أماكن كتير ربنا يتولنا”.
واعترض نبيل على تسميته بالمتسول :”بعد إذن الجميع دا ميتقلش عليه متسول ولا يتقال عليه”.