حصل أمس اللاعب محمود متولى على رجل المباراة خلال مباراة الأهلي و الجونة والتى فاز بها الأهلي بثلاثية أحرز متولى الهدف الثاني.
وكتب الإعلامى الرياضي محمد فارس” القصة مش انه سجل هدف لا القصة انه قدم اداء استثنائي استحق عليه رجل المباراة واعلى تقييم من كل المواقع الإحصائية. عمل ١٤ استخلاص ناجح للكرة و فاز ب ٥ التحامات من أصل ٥ . وعمل ٥٠ تمريرة صحيحة من ٥٦ تمريرة . ادى الدفاع عمق وساهم بشكل عبقري في التدرج بالكرة.
ودي رسالة للأخبار اللي طلعت بعد الخسارة من الزمالك والكلام عن رحيل معلول ومتولي وغيرهم واحنا كان لسه عندنا نص نهائي افريقيا وكان لسه فاضل ٢٥ جولة في الدوري.
بعدها متولي ده راح لعب ٤٥ دقيقة كاملين في اصعب ماتش ضد مازيمبي في لوبومباشي وانهاردة رجل المباراة ومعلول ساهم في الصعود للنهائي ومن أهم اللاعبين اللي شايلينك في اللحظات الصعبة.
انا عارف ان الكلام ده بيزعل ناس والله بعزها واهلاوية بس صدقوني الاخبار اللي طلعت وكان الاعلام الأهلاوي جزء منها بعد خسارة الزمالك دي كانت تهد دول مش فريق . ومفيش حاجة اسمها سبق ولسه فاضل في الموسم اكتر من ٣٠ ماتش يعني في معطيات مختلفة ماتش واحد يقدر يغير فيها مصير لاعبين . واخر الموسم الكلام ده ممكن يكون مقبول ومنطقي.
فاتمنى الناس في اللي جي تتعلم من الدرس ده. ولو السبق هيكون على حساب مصلحة الفريق في لحظات حرجة يبقى محدش يزعل من النقد للأخبار دي لان في النهاية انت بتدور على مصلحتك في السبق وطبيعي الجمهور بيدور على مصلحة الفريق.