(حاجه مش عاديه)
م الحمل ضهرى بيتقسم
والحظ رافض يبتسم
وكإنه يعنى هينتحر
لو ييجى عندى ويترسم
لكن خلاص ناوى اجبره
لصالحى وحدي يتحسم
ناوى افَرَّح نفسى بيا
وابنى السعاده وبإيديا
ناوى أعمل أى حاجه
أى حاجه مش عاديه !
انشلا حتى البس باروكه
ابقى واد فرفور بتوكه
أحضر قضيه بجلابيه
أطلع لفوق اخطف نجوم
بإيديا اشيل كل الغيوم
أنزل لميت اقوله قوم
إرجع لبحر الدنيا عوم
مش عدل خالص نتوجع
وانت هارب م الهموم
ليه سايبنا بنتخدع ..
غرقان لوحدك فـ احلى نوم ؟!
ناوى بردو ابيع صحابى
بحق فرده من شرابى
تيجى فرحه تقولى بابى ..
ولو تبَنِّى إبقى ليا !
ناوى اجيب كشكول ورق
واملا فيه حزن السنين
واكتب مقاله انه اتسرق
معرفش سرقه منى مين
وإدانى عِلم انه اتحرق
ومعادش ينفع ليه حنين !!