كنت صغير لسه ونونو وأمى جبتلى لبس جديد
وقالتلى إنزل إلعب هيص وإتنطط وإفرح بالعيد
-ويلف العيد ويا التانى وانا ثابت برضك في مكانى
-وبكرر نفس اللى عملته وأهو أول عيد زى التانى
-العيد مش جزمة وجلابية
العيد مش فرحتى ب “عيدية ”
-ولا اصرف كل اللى معايا وأداين وأعمل جمعية
-العيد مش مكياج وبلوزة وأطبخ فتة ومحشى وكوسة
-وأعزم أحبابي وقرايبي يتزحم البيت وأبقي في حوسة
-العيد مش سجاد ب نلمه ونعول الهم في تنضيفه
-ولا كعك وبسكوت يتعملوا والكل يشكل على كيفه
-العيد مش بومب وصواريخ ولا ذكرى تعدى في تواريخ
-وباعيشها ومش فاهم المعنى وكأنى شارب ” مية بطيخ ”
-العيد مش بس إنى اتفسح واروح المرجيح واتمرجح
-واخش السيما ويا الشله ويفض العيد يلا واروح
-وأغير تسريحة شعرى وأعمل نيولوك
-وأتصور كده كام صوره حلوة وأنشرها معايا على الفيسبوك
-والبنت خلاص جالها عريس ويقولوا تتجوز عالعيد
-وكأنه بقي محطة اتوبيس يستنوه لو لسه بعيد
-للأسف العيد بقي عرض ازياء
-وفي ناس في العيد تعمل اشياء
-تغضب ربنا وتقولك عيد
-وكأن العيد فسحة ومدرسة يلحق يعمل اللى في نفسه
-وقبل ما جرس الفسحه مايضرب يشرب يسكر ويهين ربنا ينكر إسمه
-يضحك ويقولك تفاريح وعشان يبقي كلامى صريح
-أنا مش مدمن أنا مش سكير ماتشيلش في قلبك ياكبير
-دا يومين في السنة نفرح فيهم ماتحبكهاش ماتضيقهاش خلينا رايقين ” ماتعكنناش ”
-ياخسارة ياعيد قيمتك غالية وضايعه بلاش أومال ايه بس العيد………… ؟؟؟؟؟ !!!
-العيد انى أطيب خاطر وأمد إيديه وأساعد الناس وأقول حاضر
-وأسامح وأغفر من قلبي من جوه مش بس الظاهر
-العيد إنى أشارك غلبان يفرح بيسوع فيبات شبعان
-العيد انى اعيشه في قلبي يظهر في أعمالى ويبان
-العيد انى اقوم من ضعفي وابص لفوق انسى الماضي
-وأفرح بيسوع وأشهد عنه ولأ أعيش وبكرر ع الفاضي
-وانا تانى بأكد وبأعيد ويا كل قريب وبعيد
-العيد أسمى وأرقى وأكبر من انه يكون حبة تقاليد