أساس تكوين اللغة المصرية, بيعتمد ع الإسم
يعني الجملة فـ اللغة المصري بتبدأ بالإسم (الفاعل) فـ أكتر حالاتها:
سيادة الريس زار فرنسا, النهاردة
أو
النهاردة, سيادة الريس زار فرنسا
ده تكوين الجملة حسب طريقة كلام المصريين
يعني الشبه اللي بين الكلام المصري والكلام العربي, شبه فـ الألفاظ بس, لأن كلها ألفاظ من جدور مصري قديمة!
انما قواعد كلام المصري بتختلف عن قواعد كلام العربي!
شوف كده الجملة اللي فوق دي, لو ترجمناها من المصري للعربي, هتنكتب إززاي؟
قام اليوم السيد الرئيس, بزيارة فرنسا
أو
قام السيد الرئيس بزيارة فرنسا, اليوم.
………..
أساس اللغة العربي قايم ع الفعل, وأساس اللغة المصري قايم ع الإسم!
طب, السبب إيه؟
الإسم يعني الفاعل, وتكوين مصر اعتمد ع الفاعل فـ تنظيم الطبيعة!
الأفعال كتيرة, ومسارها الطبيعي متوقع ومعروف, اللي بيفرق هوه تصرف الفاعل!
ببساطة, الفلاح هوه الفاعل الأساسي فـ أفعال الزرع والري وجمع وتشوين وتوزيع المحصول!
حياة مصر القديمة, اللي إتأسست فيها اللغة, الزراعة فيها هيه أساس المجتمع والاقتصاد, ويبقا طبيعي إن اللاعب الأساسي فـ نظام المجتمع ده, يبقا هوه أساس تكوين الجملة!
الطريقة دي أثرت فـ تكوين فكر وثقافة المصري القديم, وده هوه اللي خلاه حدد إسم لكل رمز من رموز الطبيعة, عشان يقدر يحدد الفاعل:
ماية النيل, بقا رمزها واسمها “حابي”!
ماية السما, بقا رمزها السما “نوة”, و”نطرة”!
الأرض, رمز “جب”!
الشمس, رمز “رع”!
القمر رمز “خنسو”!
الهوا, رمز “شو”!
والنجوم, لها إسم ورمز .. لخ, كل رموز الطبيعة بقا لها إسم وحكاية بتحدد تاريخها ودورها!
يعني ميل المصريين للجملة الإسمية اللي خلاهم يحددو أسامي لكل رموز الطبيعة؟
أيوة, ومش بس كده, كمان الإسم بقا هوه المصر للفعل!
صعبة دي شوية, دا احنا اتعلمنا فـ دراسة اللغات -حتا اللي بيدرسو هيروجليفي- إن الفعل هوه المصدر والجدر!
لا يا سيدي, عندنا حاجة تانية, المصدر فـ اللغة المصري هو الإسم, ويتصرف منه اسم الفاعل والمفعول والصفة, والفعل نفسه مجرد تصريفة من إسم!
الإسم المصري للـ “عيش”, رغيف أو وجبة, اتصرف منه: عاش/ عايش/ يعيش/ عشا/ معيشة!
والإسم المصري للنجم “ساح”, اتصرف منه: سح/ ساحح/ سايح/ سواح/ سياح!
كلام المصريين الحالي, لغة كاملة, ولها لهجات, ميصحش ننسبها لأي لغة تانية, لأن دي مرحلة من مراحل لغة بقالها آلاف السنين, عايشة بقواعدها ونظامها وألفاظها!
#بنتكلم_مصري
يبقا بدل ما نهينها, نحاول نتعرف عليها ونفهمها, وكمان لازم يبقا فيه أقسام فـ الجامعة تبحثها وتدرسها!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.