الفليسوف (الفيلسوف) الإنجليزي, برتراند راسل لخص جوابه عن سبب نبوغ تلاميذه, بإنه بيسيبهم يتكلمو براحتهم فـ تلات حاجات:
• السياسة والدين والجنس!
التلات تابوهات دول هوما الخطوط الحمرا فـ معظم مجتمعاتنا, والكل بيحاول يتجنبهم, بالكلام فـ الكورة والأكل واللبس والحياة الشخصية للمشاهير .. لخ!
رغم ان اهتمامي وكتابتي فـ “دراسات الهوية المصرية”, من زاوية اللغة المصرية والأعياد المصرية القديمة, الا اني مضطر النهاردة ألمس حدود التابوهات أو المحرمات التلاتة دول:
• السياسة والدين والجنس!
الجدر المصري المكتوب بالحرف الهيروجليفي: “مرت”, يعني حبيبة, اتصرف منه فـ كلامنا المصري الحالي, كلمة “مرة” يعني واحدة ست, وبارضو التصريفة العربي “امرأة”, انما بسبب التابوهات التلاتة اياهم دول, بقت التصريفة العربي “امرأة”, حلوة وكويسة ومحترمة, انما التصريفة المصري “مرة”, بقت وحشة وكخة وبيئة, وساعات تبقا شتيمة!
يعني الجدراللغوي “مرت” واحد, انما بقدرة قادر, اتقدست التصريفة العربي, واتشيطنت التصريفة المصري!
• التصاريف العربي لها مؤسسات وهيئات بتقدسها وبتحميها وبتدفيها!
…………
الجدر المصري المكتوب بالحرف الهيروجليفي “ورت/ ولت”, يعني عظيمة, اتصرف منه فـ كلامنا المصري الحالي, كلمة “ولية” يعني واحدة ست, وبارضو التصاريف العربي “والي” و”ولي”, انما بسبب التابوهات التلاتة اياهم دول, بقت التصاريف العربي, حلوة وكويسة ومحترمة, والتصريفة المصري “ولية”, بقت وحشة وكخة وبيئة, وكمان بمعنا الضعف فـ تصريفة “ولايا” يعني ملهمش حد!
بارضو الجدر اللغوي “ورت/ ولت” واحد, انما بقدرة قادر, اتقدست التصاريف العربي, واتشيطنت التصاريف المصري, من نفس الجدر!
• التصاريف العربي لها مؤسسات وهيئات بتقدسها وبتحميها وبتدفيها!
شوفو, وخليكو شاهدين ع اللي هيحصل بعد كده, أنا يادوب لمست مجرد لمسة, مع حدود التابوهات التلاتة, اللي بعتبرهم مسئولين عن شيطنة حاجات كتير فـ الهوية المصرية, وضربت مثلين بس, وأقدر أضرب ميات وألوفات, مجبتش سيرة أسامي مؤسسات ولا أسامي هيئات ولا أسامي مجامع لغوية ولا أي شخصنات, أهو خليكو شاهدين!
كان ممكن أضرب مثال واضح أكتر عن شيطنة أسامي أعضاء الجسم بالمصري, اللي كلها بقت عيب, رغم ان نفس الأعضاء لها أسامي بالعربي والإنجليزي والفرنساوي وغيرهم بالتأكيد, كل الأسامي من كل اللغات, حلوة وكويسة ومحترمة, انما الأسامي اللي متصرفة من كلامنا المصري, كلها بقت وحشة وكخة وبيئة!
شيطنة اللغة الوطنية سلاح بيستخدمه عدو الهوية الوطنية
اللي يشيطن كلامك: عدوك/ اللي يشيطن هويتك: عدوك
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.