فـ كل مكان فـ العالم, بديهية الوطن والمواطن طبيعية, بيفهمها الكبير والصغير, لأنها غريزة!
كل حي بيحن لمكانه أو وطنه, بغريزة الوطن!
الطبيعي فـ كل زمان ومكان, بقينا مضطرين نشرحه لبعض المصريين (كتيييير), يعني ايه وطن!
ووصلت الأمور مع بعض المصريين دول (الكتار أوي), انهم رحبو باللي بيقولو طظ فـ مصر, و”الوطن حفنة من تراب عفن” .. لخ, ووصل الترحيب بيهم لدرجة قبول حكم السفلة الجهلة دول!
رغم اني محبش أدخل فـ أمور السياسة, إلا ان موضوع الوطن بديهية لو ضاعت مننا, يبقا مفيش مجال لأي كلام, لا الثقافة ولا الفن ولا التعليم, حتا الإنتاج والإبداع هيبقا من غير لون ولا طعم!
كدبة الوطن الخيالي الوهمي اللي بناها بتوع مشروع الإسلام السياسي, حفزت بتوع المشروع العروبي انهم كمان يبنو وطن خيالي وهمي بديل للوطن الحقيقي!
وبكده بقا سكان مصر متوزعين بين كدبتين: “وطن الخلافة الإسلامية”, و”وطن القومية العربية”!
كيانين مليانين وهم, اتبنو بالتزوير والتدليس, واتصرف عليهم مليارات, مدارس وجامعات ووزارات وقنوات ومحطات, عشان المصريين ميبصوش تحت رجليهم, عشان ينسو الأرض اللي شالتهم وسترت عضم جدودهم!
……….
الكدب والتزوير اللي بيهم اتبنت كيانات الوطن الوهمي البديل, أساسها كان حاجتين:
• تكفير الجدود: بكدبة فرعون الهكسوسي اللي لزقوه فينا, وكأننا مسئولين عن ذنوب المحتلين المجرمين!
• طلسمة اللغة: نطقوها بالألغاز, وقالو ان لساننا اتقطع, ونسونا كلامنا, وعلمونا ان اللي مكتوب ع البرابي والأهرامات والمسلات, كلام زي الحجر, ميت مفيهوش روح!
مفيش فـ آثارنا لا لقب ولا وظيفة اسمها “فرعون”, وإن اللي اسمه “فرعون” ده, مش موجود فـ قوايم الملوك بتوعنا, ودلوقتي كلهم معروفين بالإسم واللقب, يبقا اللي يقولك إن كل ملوك مصر “فراعنة” قاصد يشيطنك ويشطن تاريخك!
كمان “اللغة كائن حي”, بيتصرف وبيتبدل حسب الزمان والمكان, ومفيش كلمة تفضل جامدة آلاف السنين, إلا لو اتعاملت معاها زي ما بتتعامل مع الطوب والزلط!
شوف الكلمة دي اللي فـ الصورة من مرحلة الكتابة بالحرف الهيروجليفي:
جنو = فروع/ أغصان/ تشبيكة الفروع والأغصان!
دي الجدر اللي اتصرفت منه كلمة “جنينة” فـ كلامنا المصري الحالي, وكمان تصريفة “جنة” فـ الكتاب المقدس!
زي الكلمة دي فيه آلاف الجدور, وكل جدر بيتصرف منه عشرات!
يعني كلامنا الحالي مجرد تصاريف من كلام جدودنا!
ويعني اللغة حية وعايشة معانا وبيننا!
اكتب واتكلم بكل لغات العالم, مفيش مشكلة, بس إوعاك تنسا كلامك المصري!
لغتك الأساسية, لغتك القومية, لغتك الأم, هيه اللغة المصري, اللي بيقولو عليها العامية!
البديهي يا مصري, انك ملكش وطن إلا مصر!
البديهي يا مصري, إنك تعلم ولادك تعليم مصر!
البديهي يا مصري, إنك تأسس ثقافتك حسب ثقافة مصر!
البديهي يا مصري, انك تجتهد فـ مدرستك وشغلك وغيطك ومصنعك عشان ترفع اسم مصر!
البديهي يا مصري, انك تعيش وتحلم بنعيم جنتك, أو تبنيها بإيديك, بارضو فـ مصر!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.