العقيدة والعقد والاعتقاد، من الجدر المصري القديم “عقت/ عقد”، بمعنا المخزون!
ممكن نتكلم عن عقيدة المصريين بأنها خلاصة مخزون المعارف والتجارب، لشعب طيب قديم!
الأديان والمذاهب والطوايف كلها بأشكالها وطقوسها تتخلط عشان تكون تراكم قيم وتراكم خبرات، هيه دي عقيدة المصريين!
من ألاف السنين عندنا عقيدة واحدة، سيبك م التفاصيل، خليك ف المجمل، خليك ف المخزون الأساسي!
شكل الصيام إززاي، ولا طريقة الصلاة إيه؟ مش مشكلة وعمرها ما عملت فرق!
روح المصري، طيبة المصري، جدعنة المصري، كرم المصري، كرامة المصري، عقيدة ضمير جواني!
يعشق وزير ويقدس يسوع ويصلي ع النبي!
يحب الخير، ويحترم الصوغير والكبير!
مخزون خبرات وأفكار المصريين بقت عقيدة، تخليه يبعد عن الشر ويغني له، وأما الشر يعند ينضرب ويتأدب، بارضو حسب نفس العقيدة!
دينك لنفسك، بينك وبين ربنا، مذهبك لنفسك متحشروش عندنا، عقيدة مصر دي اللي تخصنا كلنا.
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.