شهر كيهاك رابع شهور السنة المصرية
رابع وآخر شهور فصل “أخت” الفيضان.
أصل الإسم “كا-حر-كا”، لو ترجمناها بالحرف = روح فوق روح، انما الترجمة بالمعنا = لقا الأرواح!
ف شهر كيهاك النهار بيقصر، لدرجة إن المصريين عبرو عنه بالمثل الشعبي:
كياك صباحك مساك. تقوم م النوم تحضر عشاك!
بالنسبة للمصريين كان شهر مبروك. مليان مناسبات وأول مناسبة عيد شهر كيهاك. وده مش عيد مخصوص. إنما كان المصريين بيحتفلو ببداية كل شهر. وبيحتفلو بنص الشهر. وكمان بيحتفلو بنهاية الأسبوع “عاشورا/ عشرتيام”، يعني كده المصريين كانو بيحتفلو خمس مرات كل شهر × ١٢ = ٦٠ حفلة. غير الأعياد السنوية اللي حصرتها ف ملاحق كتابي #الأعياد وعددهم ٧٩ عيد. يعني ع الأقل كان المصري القديم بيحتفل بحوالي ١٤٠ عيد لأن فيه كمان الأعياد الشخصية وأهمهم أعياد الميلاد!
جدودنا المصريين بنو حضارتهم ومجدهم بالعمل والعلم والضمير الحي وفرحو نفسهم بالأعياد!
أيام السنة كلها فرح وكلها عيد. والعيد بيبدأ وقت ماينتهي الشغل. يعني الأعياد كانت بعد الشغل تسلية و ترفيه وراحة للنفس!
نرجع لشهر البركة “كيهاك” اللي بيبدأ بعيد الشهر وينتهي بعيد إسمه عيد البهجة. عيد ممنوع فيه الزعل.
أما أهم المناسبات اللي ف شهر كيهاك. ان فيه موسم الحج الأوزيري. الحج لأبيدوس مقام راس وزير!
الحج الأوزيري أربعتاشر يوم بتبدأ بعيد الشجرة “شجرة أوزوريس” ومهرجانات ومسرحيات انتصار الصقر سوكر ويوم السعي (سعي إيزيس ف الأرض للتفتيش عن جسد جوزها)، وتنتهي أيام الحج بعيد رفع عمود جد!
العجيبة إن المصريين المسيحيين لسة عندهم شهر كيهاك شهر بركة فيه الصوم وفيه أفراح ميلاد المسيح. الشرقي والمغربي!
وبنهاية شهر كيهاك والاحتفال بالضحك والتنكيت اللي هوما أهم صفة ف شخصية المصريين النهاردة. بتحل بركة شهر طوبة، فيه البرد والعجوبة!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.