موعد‏ ‏مع‏ ‏الشيطان ‏(‏٦)‏

عارف‏ ‏يا‏ ‏آدم‏ ‏لو‏ ‏عاوز‏, ‏تفسد‏ ‏مجتمع‏ ‏وتدمره‏ ‏بمنتهي‏ ‏السهولة‏ ‏والسرعة‏ ‏تعمل‏ ‏إيه؟
إيه؟
‏.. ‏تفسد‏ ‏الست‏ ‏إللي‏ ‏فيه
وعارف‏ ‏إزاي‏ ‏تفسد‏ ‏الست؟
إزاي
تفسد‏ ‏الراجل‏ ‏إللي‏ ‏معاها
إيه‏ ‏الكلام‏ ‏ده؟‏.. ‏وإيه‏ ‏علاقته‏ ‏بالباب‏ ‏إللي‏ ‏إحنا‏ ‏واقفين‏ ‏قدامه‏ ‏ده؟
ده‏ ‏حتي‏ ‏مكتوب‏ ‏عليه‏ ‏حجر‏ ‏الزاوية‏ ‏حتي‏ ‏مفيش‏ ‏سيرة‏ ‏ستات‏ ‏ف‏ ‏الموضوع‏!!‏
ادخل‏ ‏معايا‏ ‏وأنت‏ ‏ساكت‏ ‏وأنت‏ ‏تعرف‏ ‏كل‏ ‏حاجة‏.. ‏ما‏ ‏إحنا‏ ‏قلنالك‏ ‏إحنا‏ ‏عبدالمأمور‏ ‏والخالق‏ ‏أمرنا‏ ‏نفتح‏ ‏عينك‏ ‏علي‏ ‏كل‏ ‏خبايانا
تعالي‏ ‏معايا‏ ‏يا‏ ‏آدم‏..‏
وانفتحت‏ ‏بوابة‏ ‏حجر‏ ‏الزاوية‏ ‏ودخل‏ ‏آدم‏ ‏مع‏ ‏الشيطان‏ ‏المصاحب‏ ‏له‏ ‏ومشي‏ ‏جوه‏ ‏المكان‏ ‏مسافات‏ ‏مرعبة‏ ‏برضو‏ ‏في‏ ‏في‏ ‏لمح‏ ‏البصر
لحد‏ ‏ما‏ ‏لقي‏ ‏آدم‏ ‏نفسه‏ ‏كالعادة‏ ‏قدام‏ ‏سور‏ ‏عملاق‏ ‏عليه‏ ‏طلاسم‏ ‏مخيفة
طبعا‏ ‏أنت‏ ‏مش‏ ‏فاهم‏ ‏أي‏ ‏حاجة‏..‏
فعلا‏.. ‏بس‏ ‏خايف
ليك‏ ‏حق‏.. ‏الموضوع‏ ‏مرعب‏ ‏مش‏ ‏مخيف‏ ‏بس
افتحلي‏ ‏مخك‏ ‏كويس‏ ‏واسمع‏ ‏إللي‏ ‏هقولك‏ ‏عليه‏ ‏بأمر‏ ‏رب‏ ‏الكون
المرأة‏ ‏هي‏ ‏الأرض‏.. ‏التربة‏ ‏اللي‏ ‏بتتدفن‏ ‏فيها‏ ‏البذور‏ ‏وتتسقي‏ ‏وتكبر‏ ‏وتطلق‏ ‏شجر‏ ‏مثمر
صحيح
طيب‏ ‏لو‏ ‏إحنا‏ ‏خلينا‏ ‏الأرض‏ ‏دي‏ ‏بور‏ ‏هيحصل‏ ‏إيه؟
مش‏ ‏هتطلع‏ ‏شجر‏ ‏ولا‏ ‏نبات‏ ‏أصلا
طيب‏ ‏وإيه‏ ‏رأيك‏ ‏بقي‏ ‏لو‏ ‏خلينا‏ ‏التربة‏ ‏فاسدة‏ ‏وسامة؟
هتطلع‏ ‏نبات‏ ‏وشجر‏ ‏بثمر‏ ‏فاسد‏ ‏وسام
الله‏ ‏يفتح‏ ‏عليك‏ ‏مانت‏ ‏بتفهم‏ ‏أهو‏..‏
الستات‏ ‏هما‏ ‏الأرض‏ ‏إللي‏ ‏هنزرع‏ ‏فيها‏ ‏أتباعنا‏ ‏حجر‏ ‏الزاوية‏ ‏إللي‏ ‏لازم‏ ‏نهده‏ ‏ونشلفطه‏.. ‏هما‏ ‏هدفنا‏ ‏الفترة‏ ‏دي‏ ‏وبقوة‏ ‏بعد‏ ‏ما‏ ‏انحرفنا‏ ‏بيكم‏ ‏بوسائل‏ ‏الاتصال‏ ‏وخلينا‏ ‏العالم‏ ‏زي‏ ‏القرية‏ ‏الصغيرة‏ ‏ودي‏ ‏كانت‏ ‏أول‏ ‏وأهم‏ ‏خطوة
طيب‏ ‏إيه‏ ‏علاقة‏ ‏الستات‏ ‏بالموضوع؟‏ ‏وليه‏ ‏مش‏ ‏الرجالة؟
مستعجل‏ ‏يا‏ ‏آدم‏.. ‏علي‏ ‏طول‏ ‏مستعجل‏..‏
ومين‏ ‏قالك‏ ‏إننا‏ ‏بنبدأ‏ ‏بالستات‏ ‏يا‏ ‏عبيط‏ ‏خصوصا‏ ‏وإن‏ ‏أغلب‏ ‏البشرية‏ ‏فيها‏ ‏النزعة‏ ‏الذكورية‏ ‏إللي‏ ‏بتستخدم‏ ‏غلط
أنت‏ ‏حيرتني‏ ‏معاك‏.. ‏ولخبطتني
إحنا‏ ‏خلينا‏ ‏العالم‏ ‏في‏ ‏قبضة‏ ‏إيد‏ ‏كل‏ ‏واحد‏ ‏في‏ ‏بيته‏ ‏من‏ ‏خلال‏ ‏شاشة‏ ‏صغيرة‏.. ‏وسهلنا‏ ‏وصول‏ ‏كل‏ ‏أنواع‏ ‏المبيقات‏ ‏والمحرمات‏ ‏والانحرافات‏ ‏والشذوذ‏ ‏والنجاسة‏ ‏بضغطة‏ ‏زر‏.. ‏قوم‏ ‏يحصل‏ ‏إيه‏ ‏يا‏ ‏معلم‏..‏
الرجالة‏ ‏التعبانة‏ ‏ودول‏ ‏الأغلبية‏ ‏يجروا‏ ‏زي‏ ‏الهبل‏ ‏علي‏ ‏المصيدة‏.. ‏والمصيدة‏ ‏دي‏ ‏بيتنا‏ ‏ولعبنا‏.. ‏عندنا‏ ‏فيها‏ ‏كل‏ ‏يوم‏ ‏وبنعلي‏ ‏ع‏ ‏بعض‏ ‏لحد‏ ‏ما‏ ‏نخلي‏ ‏عبدنا‏ ‏يبقي‏ ‏زي‏ ‏الكلب‏ ‏الذليل‏ ‏إللي‏ ‏بيجري‏ ‏ورا‏ ‏عضمة‏ ‏حتي‏ ‏لو‏ ‏معفنة‏.. ‏خلاص‏ ‏بنسلبه‏ ‏إرادته‏ ‏ونلحس‏ ‏مخه‏ ‏وتركيزه‏ ‏ونضيع‏ ‏حياته‏ ‏حرفيا‏ ‏يوم‏ ‏ورا‏ ‏يوم
طيب‏ ‏وإيه‏ ‏دخل‏ ‏الستات‏ ‏بالموضوع؟
عيب‏ ‏عليك‏ ‏يا‏ ‏معلم‏.. ‏ماحنا‏ ‏برضو‏ ‏محلقين‏ ‏عليهم‏ ‏من‏ ‏حتة‏ ‏تانية‏ ‏ومحضرينلهم‏ ‏الحضن‏ ‏الحنين‏.. ‏والطبطبة‏ ‏تبعنا
الست‏ ‏من‏ ‏دول‏ ‏تلاقي‏ ‏جوزها‏ ‏أو‏ ‏خطيبها‏ ‏أو‏ ‏إللي‏ ‏بتتمني‏ ‏تعيش‏ ‏معاه‏ ‏وتكتفي‏ ‏بيه‏ ‏من‏ ‏الدنيا‏ ‏كلها‏.. ‏عرة‏ ‏وذليل‏ ‏رغباته‏ ‏المريضة‏ ‏إللي‏ ‏بقت‏ ‏تمشيه‏ ‏وتتحكم‏ ‏فيه‏ ‏وتخرج‏ ‏بيه‏ ‏بره‏ ‏نطاق‏ ‏الشاشة‏ ‏إلي‏ ‏تجارب‏ ‏حقيقية‏ ‏علشان‏ ‏يثبت‏ ‏لنفسه‏ ‏الموهومة‏ ‏إنه‏ ‏بطل‏ ‏زي‏ ‏إللي‏ ‏بيشوفه‏ ‏من‏ ‏أوهام‏ ‏إحنا‏ ‏بنحطهاله‏ ‏ونصدرهاله‏ ‏بالشكل‏ ‏ده‏.. ‏تلاقي‏ ‏نفسها‏ ‏مخذولة‏ ‏مش‏ ‏لاقية‏ ‏نقطة‏ ‏من‏ ‏إللي‏ ‏بتديه‏ ‏وتستناه‏ ‏لا‏ ‏وقت‏ ‏ولا‏ ‏اهتمام‏ ‏ولا‏ ‏تركيز‏..‏
وإحنا‏ ‏طبعا‏ ‏شغالين‏ ‏عليها‏ ‏مفاهيم‏ ‏حرية‏ ‏واستقلالية‏ ‏وحق‏ ‏ف‏ ‏الحياة‏ ‏والحب‏ ‏والإخلاص‏ ‏والهري‏ ‏ده‏..‏
تقوم‏ ‏هي‏ ‏كمان‏ ‏تدور‏ ‏علي‏ ‏حضن‏ ‏ماهو‏ ‏حقها‏.. ‏أصل‏ ‏ربنا‏ ‏مشرعش‏ ‏الانحراف‏ ‏للراجل‏ ‏وحرمه‏ ‏علي‏ ‏الست‏ ‏وبتلاقي‏ ‏لنفسها‏ ‏مليون‏ ‏مبرر‏ ‏منطقي‏.‏
الخراب‏ ‏بيدخل‏ ‏ويعشش‏ ‏في‏ ‏جدران‏ ‏البيت‏ ‏والعلاقة‏ ‏وبيني‏ ‏وبينك‏ ‏الكسبان‏ ‏الوحيد‏ ‏هو‏ ‏إحنا
ليه‏ ‏بقي؟
الأهبل‏ ‏إللي‏ ‏فاكر‏ ‏نفسه‏ ‏عنتيل‏ ‏وسبع‏ ‏البرمبة‏ ‏كل‏ ‏إللي‏ ‏بنخليه‏ ‏يتفرج‏ ‏عليه‏ ‏خدع‏ ‏ووهم‏ ‏وكلهم‏ ‏مدمنين‏ ‏الشياطين‏ ‏عارفين‏ ‏بنعمل‏ ‏إيه‏ ‏علشان‏ ‏نثبتهم‏ ‏دقايق‏ ‏نلقط‏ ‏بيهم‏ ‏المناظر‏ ‏دي‏ ‏إللي‏ ‏وعاجزين‏ ‏بس‏ ‏إحنا‏ ‏ملهاش‏ ‏أي‏ ‏علاقة‏ ‏بالحقيقة‏ ‏لو‏ ‏اتشافوا‏ ‏بالعين‏ ‏المجردة
الأهبل‏ ‏صحته‏ ‏بتروح‏ ‏يوم‏ ‏بعد‏ ‏يوم‏ ‏وعقله‏ ‏كمان‏ ‏وبيبدأ‏ ‏ف‏ ‏الحياة‏ ‏يضل‏ ‏طريقه‏ ‏ويدخل‏ ‏ف‏ ‏علاقات‏ ‏وينسي‏ ‏النعمة‏ ‏إللي‏ ‏معاه‏.. ‏كل‏ ‏العلاقات‏ ‏طبعا‏ ‏تبعنا‏ ‏وآخرها‏ ‏ذبح‏ ‏وبهدلة‏ ‏وأولها‏ ‏كمان‏.. ‏هي‏ ‏بس‏ ‏أول‏ ‏طلعة‏ ‏إللي‏ ‏بنخليهاله‏ ‏حلوة‏ ‏وبتبرق
الست‏ ‏بتيأس‏ ‏وتبص‏ ‏لنفسها‏ ‏تلاقي‏ ‏روحها‏ ‏أجمل‏ ‏وأحسن‏ ‏من‏ ‏كل‏ ‏الستات‏ ‏التانية‏ ‏ف‏ ‏بحكم‏ ‏الغريزة‏ ‏وإللي‏ ‏إحنا‏ ‏بنغذيها‏ ‏بمفاهيم‏ ‏العالم‏ ‏بتروح‏ ‏تثبت‏ ‏لنفسها‏ ‏أنها‏ ‏هي‏ ‏كمان‏ ‏مليون‏ ‏راجل‏ ‏يتمنوا‏ ‏ضافر‏ ‏رجلها‏ ‏والمليون‏ ‏راجل‏ ‏دول‏ ‏مش‏ ‏بيختلفوا‏ ‏حاجة‏ ‏عن‏ ‏الأهبل‏ ‏عديم‏ ‏الرجولة‏ ‏الخايب‏ ‏إللي‏ ‏كان‏ ‏معاها‏ ‏بس‏ ‏كده‏ ‏يا‏ ‏معلم
البيت‏ ‏بيخرب‏ ‏وجهنم‏ ‏بتعمر‏..‏
الله‏ ‏يخرب‏ ‏بيوتكم
مخروب‏ ‏يا‏ ‏آدم‏.. ‏مخروب‏ ‏وملعون‏ ‏بس‏ ‏مش‏ ‏حابين‏ ‏يكون‏ ‏علينا‏ ‏بس‏.. ‏هدفنا‏ ‏ناخد‏ ‏أكبر‏ ‏عدد‏ ‏منكم
أنا‏ ‏تعبت
اجمد‏ ‏وانشف‏ ‏يا‏ ‏وحش‏ ‏أنت‏ ‏لسة‏ ‏شفت‏ ‏حاجة‏.. ‏تعال‏ ‏معايا‏ ‏للكبيرة
وشد‏ ‏الشيطان‏ ‏آدم‏ ‏وسحبه‏ ‏بسرعة‏ ‏الضوء‏ ‏لحد‏ ‏ما‏ ‏وصل‏ ‏بيه‏ ‏عند‏ ‏بوابة‏ ‏ضخمة‏ ‏مكتوب‏ ‏عليها‏….‏
يتبع‏..‏
‏====‏
المرأة‏ ‏هي‏ ‏الأرض‏.. ‏التربة‏ ‏اللي‏ ‏بتتدفن‏ ‏فيها‏ ‏البذور‏ ‏وتتسقي‏ ‏وتكبر‏ ‏وتطلع‏ ‏شجر‏ ‏مثمر

التعليقات