!!إزاي بتحولوا واحد متدين لعبد مغضوب عليه؟!!… أنتم عديتم كل التوقعات مرحبا
بالعكس يا آدم… أسهل حاجة ف الدنيا إنك تجيب واحد من حتة منورة بالتدريج كده لحد ما تسحبه للضلمة… العكس هو إللي صعب…. وصعب جدا.
أنا مش فاهم هو مش المفروض كلام الله حماية؟ والإلتصاق بيه هو مصدر الأمان؟…إزاي يكون العكس؟
الذات…. الذات يا آدم… الذات مع التدين هلاك… أكتر بكتير من الخطية إللي ممكن حد يقع فيها ويندم ويتوب ويحس بحقارته وضعفه وعجزه قدام ربنا
يا آدم إحنا بنترعب من المتواضع لأنه عارف ضعفه وقلة حيلته قدامنا وبيرمي نفسه ف حضن إلي خلقه بمنتهي الانسحاق… ف إللي خلقه بيقويه علينا وبيكون هو جيشه… ضدنا.
إحنا نقدر علي الذات البشرية ونعرف نجيبها ف التراب لكن منقدرش علي الله بنهرب ف… ثواني.
بس أنا بسمع من أي حد متدين كلمات التواضع وإنه بشر ضعيف وميسواش حاجة من … غير رحمة ربنا وستره
انت عبيط باين عليك… وهو من إمتي إللي اللسان بيقوله هو الحقيقة… ومن إمتي الحكيم بيصدق كلام مرسل… يا آدم الكلام والوعظ مفيش أسهل منهم… ده إحنا حولناهم شغلانة وسبوبة.
وفيه ناس بوابته لكل أغراضهم الدنيئة هي الكلام المثالي والمظهر المثالي!! ده إيه المصيبة دي!! أنت جايلنا منين ياعم.
أصل أنا طول عمري بشوف ف بيوت ربنا الابتسامة مش بتفارق وشوشهم… (… لسانهم عسل قمة التواضع… الصراحة مستحيل أفكر لحظة إن مصيرهم يكون هنا.. لا هنا يخويا… أغلبهم هنا… وف أشد درجات العقاب كمان)
قليلين قوي إللي بيفلتوا من إيدينا ويكونوا فاهمين الخطة إللي بنخططها جوه بيوت ربنا عشان نلمهم يشرفوا عندنا
خطة؟.. إيه هي الخطة؟
… إحنا بنخلي إللي جوه يحس إنه غير إللي بره.
!! بس كده
معلش محتاج توضيح… ما فعلا إللي جوه غير إللي بره.. هو أنت هتساوي واحد مبيدخلش بيت ربنا بواحد مصلي وقريب من الوصايا؟!
إللي جوه بيحس إنه مختار… مختلف عن الباقيين احسن منهم… بيصلي ويصوم ويعمل كل إلي وصايا دينه بتقوله عليها… بيحس إنه بار في عين نفسه وإنه أعلي من إللي حواليه… تلقائيا بيبدأ ومن غير ما يحس يحكم علي إللي حواليه ويقيمهم بعين ربنا وكأنه نصب نفسه مكان الله
بيبدأ غروره وثقته الكاذبة بنفسه وبتميزه وباصطفافه عن الباقين تديلو حق من حقوق الله… هنا المصيبة… هو بيشرك بربنا… مش بأنه يعبد إله آخر مع الله لا ده بيعبد نفسه… وبيأله نفسه ويدي نفسه وظيفة من وظائف الله الحكم
يعني انت لما تيجي تحكم علي حد إنه كويس أو مش كويس
أو تقول فلان أحسن من فلان
أنت كده أخدت وظيفة الله… لأن مهما عملت وعلمت مستحيل هتعرف كل حاجة عن حقيقة إللي انت بتتكلم عنه وتحكم عليه ده وإللي ممكن يكون أحسن منك بمليون سنة… ضوئية في عين إللي خلقه
الحلاوة بقي ان المتدين بالباطل ده بشر وطبعا مشاعر الحقد والغيرة والاستلطاف والنفور موجودة بالسليقة فيه… وغصب عنه هي إللي هتوجه حكمه علي إللي حواليه وأكيد هيكون غلط لمجرد إنه سقط في خطية الدينونة وابتدا يتجرجر فيها
… نقوم ندخل بيه علي المصيبة التانية
التغرير بالناس الهبلة إللي فكراه رجل صالح أو رجل الله… وبتديله ودن وبتسمع لكلامه وف الآخر يطلع كلامه كله هوي نفس لأنه راح واللا جه بشر والغبي إللي سمعله ياخد … أكبر مقلب ويبعد عن الكويس ويلبس ف مصيبة
تعالي بقي للكبيرة… احنا بنستخدم المنافقين دول من أشباه رجال الله في خدمة مصالحنا (… إحنا
إزاي بقي؟
هو راجل كبارة من بره حاجة عظمة كلمته مسموعة وظاهريا بتاع ربنا ف عيون إللي)حواليه
ييجي واحد منيل لكن لينا مصلحة ندخل يخرب النفوس إللي جوه بيوت ربنا هنخلي الكبير ده يطلع مليون آية تدعم بيها المغفرة والاحتواء وممكن يتحط ع الراس ويمسك مسئولية كمان لو فيه مصلحة منه لينا
لكن لو حد زي الفل ولو دخل فعلا هيجيب قلوب بجد وبنقاوة لربنا احنا ندور له ع غلطة أو حاجة عبيطة ولو إشاعة أو تأليفة ونفضل نكررها علي بق الكبير ده ف كل حتة علشان برضو الهبل يختاروا الشيطان إللي تبعنا بس إللي داخل بآيات المحبة والغفران ويخسروا الكويس فعلا وإللي هيملا المكان بروح الله بآيات برضو تدعم استبعاده وكله بما يرضي الله ومن كلامه بس بمزاجنا وف الحتة إللي عوزينها مع الشخص (… المطلوب أو المرفوض منا
… ياولاد ال
الأبالسة… ولاد الأبالسة)
شفت البر الذاتي والتدين الظاهر بيضيع كام واحد بسبب واحد بس بار في عين نفسه وعين الأغبياء من الناس (إللي بتحكم بالظاهر وتصدق المظاهر
طيب… دي أول بوابة في السقوط الممنهج… إيه البوابات التانية دي؟
(تعالي معايا وأنا هدخلك تاني بوابة وهعرفك إيه تاني خطة لينا في السقوط الممنهج)
ومشي آدم تاني مع شيطان البر الذاتي مسافات طويلة برضو في لمح البصر لحد ما وصل لباب جديد مكتوب عليه
؟؟
….
…. يتبع