يعني العلو وصف باللغة المصرية للشجر وللمكان اللي بتنتهي فيه رحلة خلود الميتين المبرورين!
مكان متحوط بالعلو يعني متحوط بالشجر، جواه غيطان قمح وترع وضل ونعيم إسمها غيطان اليارو!
………….
ده وصف الجنة من كتب جدودنا اللي محفوظة مع مومياواتهم!
………….
علوي شجرة بإسم النتر وزير لها مهرجان كل سنة اسمه مهرجان شجرة وزير (أوزوريس) بيبدأ بيه موسم الحج لأبيدوس!
مصر كلها كانت بتحتفل بالمهرجان ده. إنما إحتفالات الحجاح بيه كان لها وضع خاص، لأن كل حاج كان بيزرع شجرة جمب مقام راس وزير. وده الهدف من الحج المصري القديم: زرع شجرة!
زرع الشجرة رمز لخلود وزير. ومعاه كمان خلود كل الميتين اللي بينزرع لهم شجر! عشان كده لغاية دلوقتي بنزرع ف الجبانات جمب مدافن الميتين!
…………
الحج لأبيدوس موسم مدته أربعتاشر يوم بيبدأ بمهرجان شجرة وزير وينتهي بمهرجان رفع عامود جد!
من ١٥: ٢٨ كيهك يعني من ٢٤ ديسمبر: ٦ يناير كل سنة!
…………..
بنستفيد من الحكايات دي كلها ايه؟
١- ثقافة ومعرفة بعلوم اللي سبقونا.
٢- فخر بتاريخنا الغني بالعلوم والأفكار يملانا ثقة ف نفسنا ويدعم شخصيتنا. تدعيم ينفعنا ف مواجهة هموم الحاضر والمستقبل.
٣- نقدر نستثمر كل ده ف السياحة الثقافية وندعم اقتصادنا بأقل التكاليف.
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.