أحداث السياسة بتضطرنا ساعات نكتب، بوستات مناسبات!
رغم اني كتبت كتير، وان كان فيه عمر كمان، هكتب تاني، عن انتماءنا وأصلنا الأفريقي!
أفريقيا أصل نيلنا وأصل خيرنا، ونكران المعروف مش من طبعنا!
جدودنا العظام أوي، أو سلفنا الصالح الحقيقي، وصفو مصر بلدهم بإسم “كمت”!
زاي ما في الصورة بالهيروجليفي: “كمت” = الأرض السودا/ مصر!
السواد وصف حقيقي وموضوعي للأرض اللي اتكونت من ترسيب الطينة بعد ما سافرت وعدت بلاد وجبال من قلب أفريقيا، عشان ترسي عندنا، تطفي نار الصحرا، وتخضر الزرعة!
الحقيقة ان طينة الأرض السودا، نسبتها ما تزيدش عن 4 فـ المية 4% من مساحة مصر!
باقي المساحة، فوق الـ خمسة وتسعين فـ المية لونها أصفر، ابقا شوفها م الطيارة!
رغم كده جدك كان واقعي وموضوعي، وعارف الفايدة فين، ونسب الخير لأهله! سماها كمت!
مصر لها أوصاف وأسامي كتير، منها الإسم المشهور (ايجيبت)، اللي رأيي انها تصريفة من اسم رب الأرض “جب” واسم الجواز لمراته “جبت”، وحتا الإسم الرسمي دلوقتي “مصر” بارضو تصريفة من جدر مصري أصلي منسوب للشمس “رع”!
رغم الأسامي والأوصاف الكتير بيفضل اسم “كمت” الأقدم، وتوثيقه أكتر، كفاية انه الإسم اللي استخدمه الملك رمسيس فـ كتابة أقدم وأول وثيقة سلام فـ الوجود!
اسم “كمت” بينبهنا لأهم ثروة عندنا: الأرض الزراعية!
كمان اسم “كمت” بيرشدنا لأهم دايرة فـ انتماءنا: أفريقيا!
أنا مش قلقان خالص بالنسبة لمشكلة سد النهضة، وشايف انها محلولة!
حتا لو اتحلت بالخناق، مفيش مشكلة بارضو أهو الإخوات بيتخانقو ومصارين البطن بتتخانق، انما فـ الآخر مسيرها هتتحل وتروق وتحلا!
المشكلة الصعبة أوي، دي أديها نبهتنا لعمقنا الأفريقي اللي أهملناه، واللي لازم نديله حقه ونعمل حسابه كويس فـ تفكيرنا وتخطيطنا وتعليمنا واعلامنا، من دلوقتي وقبل فوات الأوان!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.