لو فيه مناسبة أو مهرجان مصري (فرعوني؟) وعاوز هدوم لك أو مراتك أو بنتك أو حفيدك ..لخ. ببساطة هتلاقي الجلابية الكتان او القطن مع كولة الصدر بزهور اللوتس (بابت), وحزام ايزيس المفتول بخيوط الدهب والفضة (تيت), وغطا الراس (نمس) .. لخ!
مع اكسسوارات تقليد للصنادل الجلد وعصاية الحقا ونشاشة النخخ وتاج الخبرش .. لخ!
محلات ومعارض وأماكن ياما فـ العالم كله، بتقدم نماذج جميلة للهدوم دي!
فـ الموضوع ده بقا سؤالين متكررين:
• أول سؤال: هوما ليه بيترسمو بهدوم الصيف بس؟
اللي بيسأل بيقصد ان مفيش هدوم شتوي، وكأن مصر مكنش فيها شتا!
الملاحظة صح، انما مش دقيقة، يعني فيه ملابس شتوي مرسومة، زاي اللي فـ الصورة دي، وفيه كمان عبيان (جمع عباية) شتوي، رجالي وستاتي، عندنا نماذج منها فـ المتحف المصري ومتحف النسيج والمتحف الزراعي، والمتاحف الكبيرة بره زاي المتروبوليتان/ نيويورك وغيره.
رسومات الهدوم الشتوي موجودة بس قليلة أو نادرة!
طيب سبب الندرة ايه؟
-سبب ديني ايماني، زاي كل حاجة فـ حياة المصري القديم!
لو هتدور عن سبب بنا الهرم أو المسلة أو البربا، أو التزام المصري بحروف من الطبيعة للكتابة .. لخ, هتلاقي ان أي حاجة لها سبب ديني!
بالنسبة للرسوم والهدوم، الفنان اللي بيرسم حيطان الجبانة كان بيلتزم بحاجتين:
1- المثالية، ف رسمة الأشخاص، يعني نادر لما الفنان المصري يرسم حد عجوز ومكرمش أو بكرش، كله شباب ورجولة وأنوثة .. عشان دي الصورة الحلوة اللي يحب يكون عليها فـ الآخرة، كمان تغطية الجسم بالهدوم الكتيرة مبيحققش ظهور المثالية دي!
2- الشمس (رع)، وجوده أساسي فـ كل نصوص الكتب الدينية اللي بتنكتب ع البردي والحيطان، طب ازاي تكون شمس الدفا طالعة ومنورة الدنيا, والميت متكلفت ببطانية صوف؟
يبقا السبب الأساسي لتصوير المصريين القدام بالهدوم الصيفي, وجود الشمس أو تصور وجودها!
بالنسبة لصور العمال والفلاحين, طبيعي انهم يكونو بأقل هدوم أو حتا عريانين خالص, واللي مش مصدق يبقا يتفرج علا ماتش كورة فـ ألمانيا أو روسيا فـ عز الشتا تحت الصفر, واللعيبة لابسة شورت وفانلة بس, واللي يجيب جون بيقلع الفانلة كمان!
• تاني سؤال: ايه اللي نقدر نلبسه دلوقتي من هدوم المصريين القدام؟
صحيح ان الدنيا بتتطور والموضة كل سنة ويمكن كل يوم لها شكل ولون جديد, انما لازم نعرف ان الهدوم جزء أساسي من هوية أي شعب, فيها شخصيته وفيها راحته النفسية قبل البدنية! وان الهدوم الكشري اللي بنلبسها دلوقتي سبب من أسباب بهوت وميوعة الهوية الوطنية!
– تقدر سيادتك تلبس جرافتة عليها رسمة مصري!
– تقدري حضرتك تضيفي كولة البابت أو حزام التيت لتفصيلة فستانك!
– ممكن مجلس النواب يراجع النص بتاع الزي الرسمي بالبدلة الكاملة الإيطالي, ويرجع للجلابية البلدي اللي مرسومة ع الحيطان من آلآف السنين ولسة موجود نماذج منها فـ المتاحف!
– فانلات فرقنا الرياضية ومتخباتنا ضروري تكون بكولة البابت وزهور اللوتس!
– يونيفورمات المدارس, لازم يكون فيها تيمة مصرية!
حاجة عجيبة, ينفع الكون كله يبقا عارف هدوم المصريين القدام, وعنده معارض ليها, وبيخلدها فـ برامجه وكتبه وأفلامه, واحنا لسة تاتا تاتا خطي العتبة؟
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.