من البدية لازم نعرف أن اللغة المصرية حاجة، واللغة المصرية القديمة حاجة تانية، واللغة المصري حاجة تالتة!
اللغة المصرية: يعني كلام المصريين من بداية وجود مصر, لغاية دلوقتي!
اللغة المصرية القديمة: بنقصد بيها تلات مراحل رئيسية قديمة مرت بيها لغة المصريين، حسب طريقة وحروف الكتابة بتاعت كل مرحلة من المراحل التلاتة دول، حروف الهيروجليفي، وحروف الديموطيقي، وحروف القبطي!
اللغة المصري: هيه دي آخر مرحلة من مراحل لغة المصريين، يعني كلامنا الحالي المعاصر لبداية الألفية التالتة من التقويم الميلادي (2020), الألفية السابعة من التقويم المصري (6261)!
اللغة المصرية بتشمل كل المراحل أما اللغة المصري مرحلة واحدة بس!
المرحلة الأخيرة دي، اللي احنا فيها دلوقتي، واخدة قواعدها من المراحل القديمة، يعني قواعد كلامنا الحالي متطورة من قواعد المراحل القديمة، ولخصتها فـ الطريقة اللي بنتكلم بيها دلوقتي، سابت قواعد وخدت بس المناسب لزمانها!
يبقا كل قاعدة من القواعد اللي بيتكلم بيها المصريين دلوقتي، لها أصل أو جدر من قواعد اللغة المصرية القديمة (التلات مراحل اللي سبقت) ومتأثرتش بأي قاعدة أجنبية، بالعكس التأثير المصري هوه الأقدم!
نيجي بقا للألفاظ، لأن اللغة عبارة عن قواعد وألفاظ، ان كان بينظم كلامنا دلوقتي حوالي 230 قاعدة، كلهم من أصل مصري، زاي ما سبق وقلنا، كمان عندنا حوالي 50000 خمسين ألف كلمة، منهم أكتر من 35000 خمسة وتلاتين ألف كلمة من جدور مصري أصلي!
يعني ان كنا بنقول ان قواعدنا مصري بنسبة 99%, فألفاظنا مصري بنسبة أكتر من 70% سبعين فـ المية!
فيه حوالي خمس كتب بتشرح قواعد كلامنا المصري الحالي، وبدأت تظهر قواميس بتجمع الألفاظ اللي بنتكلم بيها، وكلها بمبادرات ومجهودات فردية، يعني لسة الدولة مدخلتش مجال حماية كنوز لغة المصريين، ومطلوب تخصيص قسم فـ معهد أو كلية لتدريس قواعد وألفاظ اللغة المصري، لأن مش طبيعي ان دولة تهمل لغتها الطبيعية، يعني تسيب أهم وأول باب للهوية الوطنية!
عاوزين ننقل قضية لغة المصريين من دايرة الفردي والعشوائي، لطريق الجماعي المتنظم والحتمي!
طيب السؤال بقا، هوه الكلام ده مهم لدرجة اننا نطلب من الدولة تخصص له أقسام فـ الجامعة، عشان بعد كده تنزله فـ المناهج للمدارس؟
الجواب: أيوة دراسة وتدريس اللغة اللي بيتكلمها وبيفكر وبيحلم بيها الناس، مهمة لخمس حاجات:
التواصل/ المعرفة/ التأثير/ الفهم/ التعبير عن الذات
يعني اللغة المصري، اللغة اللي بنتكلمها دلوقتي مهمة بالتأكيد لواقعنا الحالي، ومعرفش اززاي هنخطط ونبني مستقبلنا ومستقبل أحفادنا من غير ما ندرس وندرس لهم أساس التواصل والمعرفة والتأثير والفهم والتعبير عن الذات؟
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.