الكناية من أهم قواعد اللغة! ألفاظ كتيرة من كلامنا أصلها كنايات! بناخد كلمة معانيها لها علاقة بحالة معينة ونسميها بيها!
من مرحلة الكتابة بالحرف الهيروجليفي. نشوف الجدر ده:
صحصح = طير/ طائر !
المخصص او الرمز بتاعه طير كبير محبوب أوي عند المصري القديم. أبو قردان رمز تحوتي رب الحكمة والعلم والتقويم. ولغاية دلوقتي بنقول عليه صديق الفلاح!
بيصحا بدري ويلقط عيشه!
نفس الكلمة بنلاقيها جدر لصوت الطيور. أو (صياح) الطيور الكبيرة أول ما (تصحا) م النوم!
يعني الكلمة لها علاقة بالصياح. وكمان لها علاقة بالصحيان بدري!
هوه ده اللي حصل بالظبط. المصريين استخدمو الجدر اللغوي ده. كناية عن الصحيان. ولو عاوزينك فايق ومركز يقولولك:
صحصح شوية!
صحصح بقا م النوم!
عاوزين شوية (صحصحة) .. نصحا ونصحصح لعلوم هويتنا، نعرفها وندرسها لأولادنا، عشان هويتنا أساس مستقبلنا!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.