في كل عام يأتي رمضان 11 يوما بدري عن السنة إللي قبلها.. أنا من مواليد رمضان الشتا.
في مصر كلها يدور مسحراتي بطبلة.. إلا في بلدنا نجع حمادي.. كل يوم الساعة 1 بعد نص الليل تدور فرقة موسيقية كونها ملجأ أيتام المسلمين من 8 عازفين ساكس وترومبيت ومزمار بلدي ورق وطبلة.. تعزف في الشوارع تصحي الناس للسحور..
وأفضل أنا صاحي انتظر الفرقة بالليل.. وعندما أسمعهم من بعيد عند جامع الست حميدة, أجري وأمسك فانوسي أبو عصفورة صفرا, وأروح البلكونة وأخبط علي بابها.. تيجي أمي تفتح لي البلكونة وترفعني علي الكرسي وتفضل ماسكاني من أستك البنطلون لكي لا أقع من البلكونة وأنا بشب وبسقف مع طبلة الفرقة.. والفرقة تقف علي أول الشارع تعزف رمضان جانا وأهو جه يا ولاد, وتتحرك لمنتصف الشارع وتقف تحت بيتنا وتعزف لأولاد عمارتنا هاتوا الفوانيس يا أولاد وتطلع الفوانيس من البلكونات وهي بتنور ليل الشتا الضلمة.
رمضان الشتا تصادف مرة مع صوم الميلاد (من 25 نوفمبر حتي 7 يناير).. الفرقة وصلت تحت بيتنا وقالت بمناسبة صوم الميلاد هانعزف ترنيمة.. 30 يوم رمضان بـ30 ترنيمة جديدة يبدأها عم أحمد (حسبما أذكر الاسم) بغناء أول مقطع وبقية الترنيمة موسيقي يبدع فيها عازف الساكس مع المزمار, والشارع يفرح لما يعزفوا ترنيمة رشوا الورد يا صبايا.. الست العدرا حاضرة معانا.. الترنيمة الأشهر لجيل الستينيات.. وأسقف وأنا لابس الدولاب كله من برد النجع القارص, وأفضل منتظر أشوف الفرقة وهي بتبعد آخر الشارع والحاج محمود حلمي بيكلم الفرقة يعيدوا مرة تانية طلع الفجر علينا.
كبرت وجابني الشغل للقاهرة..
كبرت وضاع مني الهدوء وفقدت راحة البال..
صحيت علي صوت سمكري العربيات واتعصبت من صوت الكلاكسات.. وميكروفوانات بياع الطماطم وهو بيعلي صوته علي بتاع الروبابيكيا.. وبيقسم عليهم بياع الأنابيب.. وناس رأيها أن بيكيا هو عبدالحليم القرن واحد والعشرين!!
كبرت وبقيت كاره يومي.. لا عارف أرجع ولا عارف أكمل..
عايش جوايا الطفل لسة بيخبط علي باب البلكونة مستني يسمع فرقة بتقول تواشيح وتختمها بترنيمة..
أنا عايز أرجع طفل من تاني..
أنا مواليد الزمن الراقي..
أنا مواليد نجع حمادي..
أنا.. مواليد رمضان الشتا..
صموئيل نبيل أديب عضو هيئة المكتب السياسي لحزب مصر القومي