الهدف من حياة المصري، كان ايه؟
انه ياكل ويشرب ويلبس ويتدفا ويتمتع …لخ؟
طب ما كل الكيانات الحية، بتحاول تحقق ده!
النشاط والمنافسة بين الكائنات كلها، بتدور حوالين ان كل واحد عاوز ياخد اللي يكفيه وزيادة كمان!
طب لو ده بس، هدف البشر من الحياة، يبقا ايه الفرق بينهم وبين أي كائن؟
نرجع للبداية، من ساعة ما ظهر البشر وزايهم زاي بقية الحيوانات، مفيش فرق، الا فـ الشكل!
لغاية ما استقرت جماعة من البشر فـ وادي النيل واستقرار الجماعات لازمه تنظيم!
التنظيم هدفه يحقق التوازن بين طلبات كل فرد من المجموعة، وبين امكانيات المكان، وسكانه وعناصره من نبات وطير وبقية الكائنات!
هنا ظهرت الفكرة اللي بتحقق (التوازن) ده، وبتعمل (التزام) من كل فرد، واللي ميلتزمش تتطبق عيه قيم (العدالة)، بكل (نزاهة) من الحاكم والمحكوم، أما اللي (يستقيم) ويلتزم يبقا (صالح) وجايزته انه يبقا من (الأبرار)، سكان البيوت و(البرابي) فـ الدنيا، وسكان غيطان (اليارو) وجناين (العلالو) فـ الآخرة!
هنا اتحول الأكل والشرب واللبس والجنس واللعب لوسيلة، مجرد وسيلة، لتحقيق هدف التوازن بالإلتزام والعدالة والنزاهة والإستقامة والصلاح!
بمجرد ما الهدف من العيشة اتغير، بقا الفرق واضح بين الإنسان وكل من كان!
التوازن والإلتزام والعدالة والنزاهة والإستقامة والصلاح بقا بيمثلهم رمز واحد اسمه (معات)!
فكرة الـ (معات) اللي عرفها البشر فـ مصر، هيه أول وأهم محطة فـ مشوار الحضارة!
(معات) دي رمزها واحدة ست، مفروض انها بنت (رع)، يعني واضحة وضوح الشمس!
(معات) رمزها الريشة، ومن اسمها اتصرفت حاجات كتيرة، أهمها الإلتزام بالـ (معاد)!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.