نشرت سمر فودة، ابنة المفكر الراحل فرج فودة، على صفحتها الرسمية بموقع التواصل الاجتماعي فيسبوك، منشور تتحدث فيه عما أثير مؤخرا من قبل الممثل ” أحمد الرافعي” والذي يؤدي شخصية “عمر رفاعي سرور”، مفتي جماعة أنصار بيت المقدس التكفيري في مسلسل “الإختيار”بعدما وصف في تدوينة له في ذكرى رحيل الكاتب فرج فودة بـ” ذكرى نفوق فرج فودة “.
حيث نشرت قائله:”انا متفرجتش على مسلسل الاختيار زيكم مقدرش استحمله و متأكده ان عائلة الشهيد منسي كمان ميقدروش يشوفوه لأنها بتعيد الألم عشرة أضعاف الواقع اللي عيشناه و بتعيده ألف ضعف احساسكم بالألم عند المشاهده .. محدش هيحس و لا هيعرف احساسنا غير اللي عاشه ..
لكن الظاهر ان الألم مصمم يجيلي رغم اني هربت منه ..
واضافت :”بشكر كل الناس اللي مسحت البوست على قائمة أصدقائي مراعاة لمشاعري و بشكر كل الناس اللي دافعت و استنكرت كلام هذا الممثل المتطرف .. ليه بقا حضرتك متطرف ؟ علشان حضرتك مقلتش رأي مقابل رأي .. فكر مقابل فكر .. ساعتها كنت احترمتك و احترمت اختلافنا في الآراء و الايدولجيه .. حضرتك اكتفيت بالسب و القذف كعهدنا بكم ..
حضرتك اكتفيت بمشايخك اللي كذبوا و افتروا و ظلموا و شهدوا زور أمام المحاكم و بيانات التكفير و لما ملقوش رأي يردوا بيه ملوا ايديهم بالدم ..
أعلنت سعادتك بانتصار شيوخك المتطرفين و جماعة الإخوان الارهابية بقتل رجل أمام أعين أبنائه الصغار بدم بارد .. و كان كل سلاحة الكلمة فقط ..”
واكملت:”لست فقط متطرف دموي و لكن مثلك مثل من قتله و اعلن في المحكمه عندما سأله القاضي لماذا قتلته أجاب لأنه مرتد .. سأله القاضي و من أي كتاباته عرفت أنه مرتد .. أجاب انا لا أقرأ و لا أكتب .. كتابات فرج فودة ان كنت قرأتها و انا اشك في ذلك وصفت بدقه ما حدث في مصر من صعود للتيارات المتشددة و وصول جماعة الإخوان الارهابية للحكم و ظهور التنظيمات التكفيرية التي تقتل الجيش حاليا اللي حضرتك بتعمل مسلسل عنه ..
حضرتك بتقول انك بتحب الجيش رغم أن فكرك كله بيقول انك ضدهم و طلعت في مداخلة بتعترف ان ده فكرك و فكر مشايخك .. بتضحك على مين ؟ على الناس و لا على الجيش اللي انت بتحبه بس فكرك مضاد لفكرهم و عقيدتهم !؟
الحقيقة مجرد استخدامك في مسلسل بيتكلم عن الجيش و حب الدولة و عن مناهضة التطرف الديني و الفكرى هو سقطه كبيرة جدا لان اي تعاون بينكم يفقد العمل مصداقيته الا في حالة انهم بيحطوا ايديهم في ايديكم ، التعاون المشترك مستحيل لأنكم ماشيين في طريقين مختلفين عمرهم ما هيتقابلوا .. لأنكم ببساطة بتقتلوهم ..
انا ممكن ارفع عليك قضية سب و قذف بس انا مش هعمل كده لان حبسك او التعويض اللي هتدفعه لا يمثل لي شيء .. التعويض الحقيقي هو ان الناس تعرف انك متطرف و انك برعت في تجسيد شخصيتك الحقيقية بدون تمثيل .. التعويض بالنسبالي ان الدولة تبطل تعمل منكم نجوم لها متابعين و محبين علشان تبثوا من خلالها تطرفكم .. التعويض ان أجهزة الدولة متبقاش مخترقة و يوم ما تعمل مسلسل عن الجيش تعمل تحرياتها و تنتقي من يمثلها و يقدم الرسالة الحقيقية اللي عايزين توصلوها للناس مش المضادة المزيفة ..
حزينة ان بدل ما الدولة هي اللي تاخدلي حقي منكم اعطتك مساحة تجرح فينا و في قامة فكرية مصرية زي فرج فودة”.
الجدير بالذكر أن الممثل “أحمد الرافعي” يُشارك في المسلسل الرمضاني “الإختيار” والذي يقوم ببطولته الفنان النجم أمير كرارة ،ومن تأليف باهر دويدار، إخراج بيتر ميمي، إنتاج ” سينرجي- تامر مرسي” ويشارك في بطولته عدد من الفنانين منهم؛ أحمد العوضي، أحمد فؤاد سليم، دينا فؤاد.
أخبار ذات صلة
أحمد الرافعي ينشر بيانًا على صفحته بعد انتقادات ” فرج فودة “