يعني (الماهية) مع الانصاف.. هيكونو ملك ايديكي نضاف.. وانشاللا أكل انا عيش حاف!
ده العرض الخيالي بتاع الفنان عزيز عثمان بدل للست ليلا مراد! الماهية او المرتب .. كلام مصري أصلي!
المجتمع المصري القديم كان بيتعامل بالمقايضة .. حاجة قصاد حاجة .. وزة قصاد شوية لبن او حبة خرط جبنة .. شوال بصل قصاد شوال قمح .. لخ!
بس فيه حاجات مكنش ينفع فيها المقايضة .. شغل الحرفيين والكتبة مثلن!
فيه اكتر من صورة وعملة لدفع الاجر والمرتب. منها:
(فكة) يعني حتتين تلاتة فضة .. وبعد كده بقت تتقال عن اي معدن بيندفع تمن او اجر او مرتب!
(شوكر) .. عبارة عن عبوة من خير الغيطان. خضار او فاكهة بياخدها العامل بعد ما يخلص شغله. ومنها كلمة (شيكارة) . وكمان منها (الشكر) يعني المقابل!
(ماهوة/ ماهية): دي اكتر عملة كان بيستخدمها الشعب. نوع من العيش او الأنابير اللي بتتعمل من اللبن الرايب.. كل شغلانة حسب بقا تساوي أنبورين أو تلاتة أربعة .. عيش بالغموس بتاعه!
متستغربوش أوي.. لغاية سنين بسيطة عدت – عاصرها جيلي وبعده بشوية كمان- كان الفقي والقسيس معاهم شنطة او خرج قماش أو سيالة كبيرة ف جمب الجلابية بياخدو فيهم العيش بعد ما يقرو ويباركو البيت بما تيسر من الذكر الحكيم!
خليك مصري .. اعرف اصل هويتك .. عشان ربنا يبارك ف ماهيتك!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية