عندنا وزارة للسياحة!
ومن احلا أغاني عبحليم: سواح وماشي ف البلاد سواح .. والخطوة بيني وبين حبيبي براح!
اوعا تقولي دي كلمة عربي وموجودة ف معجم مش عارف ايه!
اللي ف الصورة ده (ساح) الجدر المصري لكل تصاريف السياح والسياحة. حتا الماية بتسيح م البانيو. والسمنة بتسيح ف الطاسة!
ممكن تقول الكلمة اللي ف العربي تصريفة من الجدر المصري. مفيش مشكلة.. لأننا شرحنا قبل كده اكتر من ١٢ سبب للشبه اللي بين كلامنا المصري القديم والحالي مع الكلام العربي والعبري. اهم سببين منهم فترة وجود العشيرة العبرانية ضمن عشاير الهكسوس الاربعين! .. وفترة الامبراطورية المصرية لالاف السنين كانت معظم دول المنطقة اللي حوالينا جوه حدود الامبراطورية .. والكلام المصري كان سايح ف كل المنطقة ولسة مأثر لغاية النهاردة!
بالمناسبة دي مع زيادة الوعي برموز الهوية المصرية من الكتابة بالحرف الهيروجليفي ف وزارات ومؤسسات كتير .. ياريت وزارة السياحة تستثمر اول رمز ف الصورة من الشمال. ويبقا اللوجو بتاعها . لأنه بيعبر عن جدر الكلمة (ساح)!
الاراضي الزراعية الفاضية لسة الفلاحين المصريين لغاية دلوقتي بيسموها: (السياح)!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.