الزمان: يوم الجمعة 22 طوبة (6261) الموافق 31 يناير (2020)
المكان: بوابة مدخل الهرم، من ناحية أبو الهول!
القهوجي نبهني:
-خلي بال سيادتك، النهاردة مش يوم عادي، ربع ساعة ومش هتقدر تشوف اللي حضرتك قاعد بتستناه!
كنت بتابع الناس اللي جايين يزورو الهرم، وعشمي أشوف الصديق قبل ما يدخل!
-اشمعنا النهاردة يعني؟
-عشان ده يوم جمعة فـ أجازة نص السنة، والناس كلها جاية تتفسح وتفسح ولادها!
التنبيه كان فـ محله، كل شوية أتوبيس أو ميكروباص ينزل أمم، وناس جايباها مشي!
أمين شرطة بيتكلم ع اللاسكي وصوته كأنه قاعد معايا بيشرب شاي:
– يافندم حوالي 600 ألف لغاية دلوقتي، التأمين يا دوب ملاحق .. لخ!
بوابات من كل النواحي، وناس من كل نوع، الشعبي والبرجوازي والأرستقراطي، جلاليب وعمم وطواقي وكابات وبدل وبناطيل وبلاطي وجواكت، فساتين وبلايز وتاييرات، جزم وشباشب وكوتشات، ستات بشعرها الطبيعي وبواريك وستات متحجبة وكمان اللي مخبية (منقبة) .. بمناسبة المخبيات دول، كان فيه عدد كبير من الناس أمات دقون جايين يزورو الهرم!
من كام سنة استضافني توني خليفة عشان أحاور واحد سلفي كان عاوز يهد الهرم، طب حصل ايه من ساعتها لغاية دلوقتي؟ ما الناس كلتها جاية تزور الهرم بإحترام وأدب، بحماس وفرحة الأجازة والزيارة، مش بس كده، مصدقتش وداني أما سمعت بنت ماشية قدام مامتها اللي مخبية وباباها اللي بدقن:
-جدو أبو الهول أهوه!
اليوم العادي زوار الهرم مبيقلوش عن ميت ألف، وأيام الجمع العادية مبيقلوش عن نص مليون، يعني زوار الهرم فـ السنة حوالي خمسين مليون!
أظن زيارة الهرم مش بس فسحة، وسيبك دلوقتي م الزوار الأجانب والسياحة، زيارة الهرم بقت طقس اجتماعي للمصريين، ومش ببالغ أما أردد جملة سمعتها قبل كده:
– المصري ميبقاش مصري الا أما يزور الهرم!
مبالغة شوية، ممكن تكون مبالغة، بس قبل ما تقرر انها مبالغة ولا لأ تعالا أقعد مكاني وشوف طوفان البشر وحماسهم وفرحتهم بالزيارة، حاجة ماتشوفهاش الا فـ الحج!
ملايين حجاج جبل طيبان، وملايين حجاج جبل عرفات، وبارضو ملايين حجاج هضبة الهرم!
كلمة هرم بالحرف الهيروجليفي = مر
بربا (معبد) الهرم كان اسمه = حر
أظن الجدرين دول (حر-مر) أصل التصريفة (حرم), بتطبيق قواعد اللزق والشقلبة واللخفنة والإهمال, وأظنهم كمان أصل التصريفة القبطي (هرم) اللي لسة فـ كلامنا!
حجاج هضبة الهرم، محتاجين رعاية أكتر، واستثمار بجد لوجودهم!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.