اوعا تفتكر ان أثار الحضارة المصرية دي مجرد شوية حجارة خارسة وخلاص!
لو كانت كده مكنش العالم كله اهتم بيها ومكنش يبقا أهم جزء ف أي متحف ف العالم هوه القسم المصري، ومكنش اتولد علم جديد خاص بعلوم المصريات (الاجيبتولوجي) ومكنتش مدارس الدنيا كلها درست العلم ده!
كل تمثال وكل وهرم وكل مسلة وكل حيطة ف بربا أو جبانة، مش بس كده كل خيط وكل شقفة وكل خرزة وكل حصوة سابها لنا جدودنا المصريين القدام نقدر ناخد منها علم وتدينا طاقة تساعدنا ف حاضرنا ومستقبلنا. بشرط سهل وبسيط، اننا نخصص جزء من وقتنا ووقت ولادنا لمعرفة علوم الآثار دي!
اسمحولي أقف شوية هنا وهرجع تاني لموضوع الأثر الحي!
علم النفس فيه قانون اسمه قانون الجذب الفكري، ملخصه: ان اللي بيحصل ف حياتنا الحالية نتيجة لافكارنا ومعلوماتنا القديمة، وان افكارنا الحالية هيه اللي بتكون مستقبلنا!
يبقا كل ما نستفيد من الافكار والمعلومات الكويسة عن تاريخنا القديم حاضرنا هيتحسن ونقدر نخطط ونأسس لمستقبل جميل!
نرجع بقا لموضوع الأثر الحي، رغم ان كل الاثار اللي اتكلمنا عنها فوق دي -وغيرها- نقدر نستفيد منها لو بقت حية ف نفوسنا، والمعلومات اللي ممكن نستخلصها منها ممكن تطور حياتنا وتملانا عزيمة عشان نواصل صناعة الحضارة، انما فيه انواع من الاثار هيه بطبيعتها حية، مش حجارة خالص! اهم أثرين من النوع الحي ده هوما: النيل واللغة!
النيل: نهر افريقي مصري بيعتبر اهم عامل ف صناعة الحضارة المصرية.. موجود من عشرات او ميات آلاف السنين .. يعني أقدم حاجة ف مصر .. أقدم من الانسان نفسه .. قدر الانسان المصري يطوعه ويروض هيجانه ويحوله لفايدة ف مشوار صناعة حضارته!
بس عشان خيالنا مايروحش بعيد ونكرر كلام هيرودوت (مصر هبة النيل) ده كلام مش مظبوط .. لان النيل بيجري ف تسع بلاد غير مصر (بوروندي ورواندا وتنزانيا وكينيا واوجندا والكنجو واثيوبيا والسودان واريتريا) طب اشمعنا الحضارة مبدأتش إلا ف مصر؟
بداية الحضارة يعني المظاهر الاثرية الحضارية الأقدم .. محدش يقدر ينكر ولا يشكك لان الأدلة والقراين الاثرية كلها بتأكد ان الحضارة بدأت ف مصر!
يعني النيل عامل مهم ف صناعة حضارة مصر انما فيه عوامل تانية شرحتها قبل كده ف كتابي: (الكنانة كيف بدأت الحضارة)!
يعني النيل اللي كان من ضمن اسباب كتير لبداية الحضارة ف مصر أهو لسة معانا حي وبيجري رهوان ويقدر يملا حياتنا خضار لو احترمناه وفهمناه!
اللغة: ودي مش هتكلم عنها كتير لان اللي متابع مقالاتي هيلاحظ ان معظمها عن لغة المصريين الحالية (اللغوة المصري) وكمان اللي شرفني بقراية كتابي: #بنتكلم_مصري بيعرف منهم ان كلام المصريين الحالي عبارة عن مرحلة من مراحل اللغة المصرية القديمة. اكتر من ٢٢٠ قاعة جرامر واكتر من خمسة وتلاتين الف كلمة جدورهم من لغة المصريين القدام .. يعني كلام جدك المصري من ألاف السنين لسة حي معاك بيشرفك ويميزك ويعلي مقامك بين الأمم!
الصورة المرفقة لحيوان له جناحين اسمه (سفر) ومنه جت كلمة السفر والمسافرين .. ده الحيوان اللي جدنا الملك (ونيس) كتب ف هرمه انه كان بيركبه ويسافر بيه للفضا .. يعني ده اقدم تسجيل لأول أفكار الانسان وأحلامه بالطيران اللي بدات هنا ف مصر. ولو استفدنا من الطاقة اللي ممكن تخلقها الافكار دي ف حياتنا الحالية أعتقد مستقبلنا ممكن يكون فيه سفن ومحطات واكوان مصرية للفضا!