في رسالة محزنة، أعلن القس جوناثان رفعت كاهن كنيسة ماربولس بالعبور إغلاق صفحته على الفيس بوك، والتي كانت تمثل بركة للكثيرين حيث كان ينشر العظات وكلمات المنفعة.
وكتب عبر صفحته رسالته لأخيرة، وجاء فيها “البوست الأخير على الفيسبوك:
“بكره هيكون ليا ٦سنين كهنوت كانوا سنين حقيقي شوفت فيهم ايد ربنا بطرق كتيرة أوي لكن في السنة السادسة دي قررت أبعد عن الفيس بوك نهائي لحد ماربنا يختار ليا خدام أمناء في قلبهم يعملوا صفحة خاصة بالكنيسه ويكون فيها تعليم وكل الأخبار الخاصة بالخدمة أو ربنا يختار باب تاني أوصل منه أي رسالة جوايا
يمكن ناس تقول عليا وحش وشرير وناس تقول ده بركه
بِمَجْدٍ وَهَوَانٍ، بِصِيتٍ رَدِيءٍ وَصِيتٍ حَسَنٍ. كَمُضِلِّينَ وَنَحْنُ صَادِقُونَ،
رسالة كورنثوس الثانية
لكن أرض الفيس بقت بالنسبالي مش أرض تفيض خدمة وثمر بس باقت أرض فيها بالنسبالي أوجاع وصدمات وياما ناس كتير من زمان قالتلي اقفل لكن ماكنتش مقتنع وحاسس إن لسه في رسالة بس الوقت اللي فات حسيت إن (إلى هنا أعاننا الرب)ومن يوم الاثنين هيكون الفيس محذوف تمامًا
أنا كتبت ده علشان محدش يفتكر أني عملت بلوك لحد ويمكن البعد عن أرض الفيس دي يشفي أوجاع كتير بسببي أو بسبب غيري..وبنعمة ربنا هيكون في باب تاني أقل بكتير في قسوته وصدماته وأوجاعه نقدر نطلع في رسالتنا اللي جوانا، أكيد في ناس كنت بشوفهم في الفيس بس خارج مصر أو محافظات ولكن أوقات من كتر ما تيار الوجع والظلم والصورة السيئة شديد فلازم تبعد لأن إحنا في عالم مهما دفعت عن نفسك في أي أمر للأسف اللي قرر يشوفك وحش أو يصدق عنك كلام صعب مش هيتغير مهما دفعت لأن في ناس بتبقى معشراك، وفي الآخر بردو يصدقوا ..إحنا مش ملائكة إحنا بشر وضعفنا..الرب يسوع مهما دافع عن نفسه قرار الصلب كان اتاخد، فالصمت والبعد وإن ربنا يباركك في الأرض الجديدة أفضل بكتير في دخول حروب نفسية تدمر رسالتك اللي الله داعيك علشانها وهي خلاص النفوس..ونصلي في قلوبنا في الصوم ده إن الله يشفينا من أخطائنا ويشفينا من الجروح والصدمات اللي خدناها في الدنيا، ويكون الصوم سبب حقيقي للتغيير
صلولي كتير في خدمتي الجديدة
وعلى رأي أحد الآباء الكبار ليا امبارح
(داري على شمعتك يا ابني)
صلولي إن شمعتي تفضل قايدة بروح الله”.
