================
تعلمت من السنين وخصوصا في رحلة مرضي وفي الشهر الأخير بالسنة ووجودي بالمستشفى أن الحاجة الوحيدة إن ربنا وحده فقط الذي يستحق الحب المطلق الغير مشروط ..
إن العلاقة مع الله هي الوحيدة اللي عمرك ماهتخرج منها خسران بالعكس انت في كل حالاتك كسبان .. وأقل شئ بتبذله بحب ومحبة ربنا بيرزقك أضعاف أضعاف مابذلته .
تعلمت أن تدبير ربنا كلها خير .. والله كله خير حتي لو في ظاهره الم ووجع .. مع الوقت بتعرف حكمة ربنا في حجات منعها عنك وأنت كنت عايزها .. وحجات قربها ليك وانت كنت كارهها ..
وأهم شئ في مرضي تعلمته أن الرضا نعمة ككبيرة جدا من ربنا وكنت متقبل المرض بابتسامة ومهما كان الوجع كنت اقوله يارب أنا راضي بكل اللي تجيبه لكن أعطيني قوة التحمل….
الرضا بكل حاجه حصلت وكل حاجة ماحصلتش .. الرضا بالموجود واللي مش موجود ..
تعلمت أن الحقد والغل والغيرة والحسد نار بتحرق صاحبها قبل أي حد ..
تعلمت الا أحكم بالمظاهر على اي إنسان … ولا احكم عليه من الكلام… أصل بيع الكلام مافيش أسهل منه .. تعلمت أن أحكم بالمواقف… التي تظهر كل شخص على حقيقته فعلا .
تعلمت أن أعطي كل واحد حقه وحجمه الطبيعي .. مايكونش في مبالغة ولا مغالاه في حب أي شخص مهما كان لأن ذلك سيكون سبب عذاب للقلب والروح ..
تعلمت ألا أعطي الحزن مساحة كبيرة من حياتي وألا استنفز طاقتي ومجهودي فيه . في حزن أو ضيق، ولكن مانقولش على حاجه ضاعت مننا أو شخص خدعنا او مالناش نصيب فيه ان دي خلاص نهاية الدنيا … طول مافينا نفس وقلب بينبض .. ربنا كاتب لينا أيام في الدنيا لازم نعيش ونفرح نفسنا مانستناش من حد الفرحة ..
تعلمت أني التمس الأعذار للناس على أي تصرف يعملوا أو حتى عن أي تقصير منهم ناحيتي لاني ماعرفش هما فيهم إيه ولا حالتهم إيه .. قلوبنا مقفولة على حكايات وجع كتير أوي محدش يعرفها غير ربنا سبحانه وتعالي ..
وأولا وثانيا وثالثا … الله وحده هو الملجأ والملاذ هو القادر علي تبديل الأحوال في غمضة عين طول مافي يقين بالله مافيش احباط ولا يأس .. طول مابنتوكل على ربنا بيقف معانا وجنبنا ويحفظنا ويحمينا حتى من أنفسنا …
وأخيراً كل عام وانتم جميعا بخير وسعادة وفرح.. وربنا يجعله عام تحقيق امنيات وتعويض من ربنا عن كل حاجة وجعتنا وجرحتنا …
كل عام وأنتم بعيد عن أي مؤذي او شر.. وبعيد عن كل الأشخاص اللي كانت سبب في أذاكم ووجعكم …
كل عام وأنتم قريبين لربنا وقريبين لكل الناس الحلوة أصحاب القلوب الطيبة اللي في حياتكم ..