بمناسبة موسم البرد (من فصول السنة المصرية القديمة: برت/ برد)!
من أشهر تعبيراتنا لوصف حالة البردان اللي كامش ايديه جوه صدره وعمال يفرك فـ ايديه وينفخ فـ بوؤه, وممكن كمان تكون سنانه بتخبط فـ بعض:
– مالك؟ انتا بتكتك كده ليه؟
– أنا مش بتكتك بس, دا أنا متكتك خالص؟
طبعن الوصف كله دلوقتي خاص بحالة الشعور بالبرد الجامد!
انما واضح ان الوصف ده اتاخد من كناية مصرية قديمة بتوصف الربكة والرعشة وصوت الطرقعة اللي بتصاحب حالة التكسير العنيف والتعدي!
نشوف الكلمة بنفس جدورها سليمة مكتوبة بالحرف الهيروجليفي من آلاف السنين:
تكتك = كسر/ تكسير/ كسر عنيف/ انتهاك … لخ!
فيه مخصصين (رمزين) بيحددو معاني الكلمة اللي فـ الصورة:
رمز حرف الإكس × هيه نفس العلامة اللي كلنا بنستخدمها دلوقتي للدلالة عن الممنوع أو المخالفة!
كمان رسمة الإيد اللي ماسكة عصاية رمز العنف!
الكلمة لها جدور تانية كمان زاي (تك) = رعشة/ ربكة!
صوت التكتكة، لسة بنوصف بيه صوت المكن ودقات (تكتكة) عقارب الساعة
متكتك عبارة عن الكناية المصرية القديمة اللي بتوصف حالة الربكة والرعشة نتيجة التكسير العنيف, تكسير العضم, منضاف ليها سابقة حرف الميم (م) لصيغة اسم المفعول والمبالغة!
يبقا: الفعل تكتك، والإسم تكتكة، وصيغة المبالغة متكتك!
يا عم الحاج دول مش كلمة ولا عشرة ولا ألف, دول أكتر من خمسة وتلاتين ألف كلمة وتصاريفهم, غير ان كلامنا مربوط بقواعدنا احنا بس, الـ 224 قاعدة اللي كلهم قواعد مصري صميم!
لسة عندك شك انك بتتكلم مصري؟ لساك بتصدق اللي بيقولو ان لغتك المصري خلاص بح؟
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.
ظ