عاوزك مصحصح معايا شوية، لأن معظم بوستاتي بتكلم فيها عن جدور صعبة!
كان ممكن استسهل، واتكلم عن (واوا وننه وكخة ومم وبح .. لخ) وغيرهم من كلامنا الأصلي!
انما أنا بكمل تأسيس نظرية مهمة أوي للهوية المصرية!
النظرية دي بتقول ان كلام المصريين الحالي معظمه أصلي!
يعني لسة عندنا لغة مصري كاملة، قواعد وألفاظ!
بطريقتي فـ تحليل جدور الكلام المصري، جمعت أكتر من (35000 كلمة)!
كمان شرحت 224 قاعدة فـ كتابي #بنتكلم_مصري, و اتنين بعد الطبع, يبقو 226 قاعدة!
يبقا احنا دلوقتي مش بنتكلم عامية لغة ناس تانية ولا حاجة!
أصل اللي بينقال دلوقتي ان المصريين القدام خلصو!
وان أحفادهم بقو بيتكلمو عربي، وكلامهم المصري بح!
طب اززاي واحنا الأقدم؟
اززاي واحنا الأصل؟
يعني اللغة العربية اللي احنا متهومين فيها دي، طلع 60% من جدور كلامها أصله مصري!
شوف الجدر ده من مرحلة كتابة اللغة المصري بالحرف الهيروجليفي:
منعت/ منعة = وصي/ حافظ/ حارس/ مانع الشر … لخ
كمان نفس الكلمة بنفس الحروف بييجي معاها مخصص واحدة ست حاضنة عيل صغير، بمعنا الدادة أو الحاضنة اللي كانت وظيفتها رعاية الأطفال!
يعني المعنا واضح من كل ناحية، طب ايه اللي توهها عن عينين الناس اللي دي شغلتهم؟
يعني لغاية وقت كتابة البوست ده، محدش اتكلم عن كلمة (منعت/ منعة) بإعتبارها مصدر او جدر المناعة!
مع انهم لو صرفو الجدور (زاي ما كان محسن لطفي السيد بيعلمنا) هيكتشفو كنوز اللغة المصري!
كل الحكاية انك تجرب حروف الحركة مع السواكن، يعني ألف بعد الميم تبقا (منعة): (مانعة), أو ألف بعد النون تبقا (منعة): (مناعة), مش كده والا ايييييه؟
اوعا تتعامل مع اللغة كأنها حجر زلط، اللغة كائن حي، بيتصرف وبيتطور!
مناعة/ مناع/ مانع/ ممنوع/ ممتنع .. لخ, كلها تصاريف من نفس الجدر الأصلي (منعت)!
اوعاك تكون فاكرنا بنتسلا بالمصري .. أبدن, احنا بنصحي المارد الأصلي.
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.