بنمر في حياتنا بفترات بتكون عصيبه جدا بتدخلنا في نقط محوريه كتيرة و أسئله قد يكون ملهاش آخر من التأملات والاكتشافات و تحديد مسارات حياتيه تخص أعماقنا!.
بنفضل أغلب الوقت قاعدين جوه دايره مظلمه وده قد يكون أقرب مسمى لدواخلنا بنفكر في السؤال المعتاد (ليه؟) مهما كان السبب و نفضل نشيل و نحط في احتمالات بنحاول نوصل بيها لحل وسط و بتكون النهايه إنه مبيحصلش!!
والسبب الجوهري بيكون إننا دايما بندور على إزاي نحل الحاجات الفرعيه لكن الأساسيات بنتاجهلها تماما.
في مرحله كده من حياتنا البعض مننا بيسميها “مرحله النضوج” و دي مع الأسف الاغلبيه مننا مش قادر يوصل فيها للاساس عشان ببساطه بتكون ناتجه لمعافره و خبطات مع الحياه شديده.. و في مننا بيعاند طول الوقت و يحبس نفسه جوه نفس الدايره مبيبقاش عارف يخرج لسبب بسيط انه قرر انه يعمي نفسه عن الحقايق و يعند مع كل حاجه بتحصل من حوليه من غير م يكون مدرك انه غلط، انه حبس نفسه في دايره ملهاش بدايه او نهايه عجله بتلف بيها و بتوصله لنفس المكان في كل مره و فجأه يقرر انه يتمرد و يلعن كل حاجه حصلت و بتحصل و هتحصل نتيجه فقدان امل و شغف على حد ادراكه و بيقرر انه بدل م يضئ في الضلمه شمعه يعرف منها المخرج انه يلعن الظروف.