ساعات حاجة صغيرة بتفرق في نفسية البشر جدًا.. يعني ممكن كده وبكل بساطة أنك تقول لبنت مبتسمعش كلام حلو كتير الله شكلك حلو أووي انهاردة.. أو ممكن تقولي لصاحبتك على فكرة البلوزة دي لايقة عليكي أووي.. الله شكل شعرك حلو.. وأنت ممكن تقول لصاحبك أي كلمة تفرحه.. ممكن يكون الناس دي محتاجين الكلمة دي عشان مودها يتظبط.. يعني لو يومك زي الزفت وجه حد حتى لو انت متعرفوش قالك كلمة حلوة ممكن تتبسط باقي اليوم ومتفتكرش غير الحاجة الحلوة اللي حصلت..
ممكن برضو زي ما الكلمة الحلوة فرحتك الكلمة الوحشة تخليك تنتحر.. أنت مستهون بالكلمة.. لأ حقيقي ممكن تنتحر.. يعني لما واحد منبوذ من الناس كلها وأي حد يقابله يقوله يابني شكلك وحش.. لالا ده أنت مبتفهمش.. ويسمع من المدرسين ف المدرسة كلمة على فكرة أنت غبي.. بص بقى الكلام ده بسيط إزاي.. بس ممكن إنسان يخسر حياته.. مش بالموت بس يعني.!! لأ ممكن يدخل في حالة اكتئاب حادة لدرجة أنه ميبقاش قادر يتواصل مع الناس.. ويبدأ يتواصل مع حاجات تانية.!!!! آه هيتواصل مع حاجات تاني إحنا ممكن منشوفهاش.. هيخلق ناس يستحملوه ويحبوه في دماغه.. آاااه يعني هيبقى مجنون… لا هو مش مجنون هو بس ملقاش حد يديله الاهتمام المطلوب ويحبه..!