اسم “مصر” من أصل مصري، لا عربي ولا عبري!
كان اسم بلد، واسم معبد، واسم مدينة:
1- “مصر” إسم بلد (دولة):
معناه = مكان إبن الشمس، منحوت من أهم ألقاب كل ملك مصري قديم (سا-رع/ صا-را), زاي اللي فـ الصورة، مع خرطوشة الملك تحوتمس التالت، وكمان هوه واحد من أسامي أوزوريس، بإعتباره الإبن البكري، عشان كده مخصص كلمة الإبن (سا) هيه الوزة، رمز أوزوريس، منضاف لـ (سا-رع) أداة المكان (ما)، وهوه ده السبب الحقيقي فـ نطق المصريين لإسم بلدهم “مصر” بفتحة الميم.
إسم الدولة “ما-سا-رع” مذكور فـ رسايل تل العمارنة، منهم رسالتين صراح من زمن الأسرة 18، بين ملك مصر أمنحتب التالت وملك بابل كدشمان أنليل الأول، حوالي (1355 ق.م)
يعني الإسم كان معروف فـ زمن الإمبراطورية المصرية، اللي كانت بتحكم ممالك الشرق القديم فـ العراق وسوريا، وكمان هوه ده السبب فـ إنتشار تصريفات من نفس الإسم فـ الثقافات البابلي والفينيقي والأرامي والفارسي، ظهرت بعد كده فـ أشكال زاي:
مصري/ مصر/ مصرم/ مصور/ مصرو/ مصرايم .. لخ.
2- “مصر”, إسم بربا (معبد):
منطقة المسلة اللي فـ المطرية دي، هيه آخر آثار أهم مدن العالم القديم، المسلة بناها الملك سنوسرت التالت علا راس بربا العاصمة الكبير، اللي هيه مدينة “أون”، وكان فيها أقدم جامعة، علماتها اللي إكتشفو “السنة”, وعملو عليها أول تقويم نجمي، والبربا اللي كان فيها هوه أهم بربا للشمس متخصص لـ النتر “رع” الشمس، البربا ده من أساميه بالمصري القديم:
ما-سا-رع (ماصر) = مكان إبن الشمس.
3- “مصر”, إسم مدينة:
قبل دخول العرب مصر، كان إسم “ماصر” بيتقال عن المكان اللي هوه إمتداد ومحيط مكان بربا الشمس “رع”، اللي إسمه دلوقتي عين شمس، والدليل نقدر نشوفه فـ كتاب تاريخ مصر اللي كتبه الأسقف القبطي يوحنا النقيوسي (620م: 664م), يعني تقريبن كان عايش فـ نفس زمن دخول العرب (642م), كتب جملة مهمة (من ترجمة جاك تاجر عن النسخة الأثيوبي) بتأكد إن إسم “ماصر/ مصر”, كان موجود ومعروف قبل دخول عمرو بن العاص:
“أن المسلمين لم يكونوا يعرفون مدينة مصر!”
بيتكلم عن مدينة إسمها “مصر”, يعني العرب دخلو من ناحية رفح والعريش، ومشيو جوه أراضي محافظة الشرقية لغاية بلبيس، كل ده من “مصر” طبعن! ولما سألو عن مكان الحامية البيزنطية اللي معسكرة فـ حصن بابليون، اللي مكانه جوه العاصمة (القاهرة) الحالية، إحتاجو لدليل عشان يوصلهم للطريق من مدينة بلبيس لمدينة القاهرة، أو “مصر”، زاي ما كان بيتقال عليها قبل دخول العرب.
“أن المسلمين لم يكونوا يعرفون مدينة مصر!”
كان فيه مدينة إسمها “مصر”!
ده هوه الكلام المنطقي اللي بيفسر ليه كل المصريين بتوع المحافظات، قبلي وبحري، سينا والواحات، مبيقولوش إسم القاهرة دي أبدن، إنما بيقولوها كده:
“رايحيين مصر/ جايين من مصر/ قعدنا أسبوعين فـ مصر/ هات لنا حاجة حلوة من مصر/ عاوزين نتفسح شوية فـ مصر .. لخ”, ولحد دلوقتي أكبر محطات الركاب فـ عواصم المحافظات، هيه “محطة مصر”!
ملحوظة: هذا المقال مكتوب باللغة المصرية وليس باللغة العربية.. الكلمات قد تبدو بها أخطاء إملائية مقارنة باللغة العربية، لكنها في الحقيقة صحيحة بحسب القواعد اللغوية للغة المصرية.