عارف لما تكون مضايق مخنوق، جواك ألف حاجة وحاجة لخبطت كيانك مش عارف ليه وازاي!!!
ساعتها بتحس إن كل حاجة مقفلة في وشك مش عارف تعمل إيه.. بتفكر تلجأ لأقرب ناس تلاقيهم عنك مشغولين، كل إنسان في همومه وأنت غرقان بين أحزانك.
بتستنى بس أي حاجة ولو صغيرة علشان تتعلق بيها وترمي عليها همومك بس في الغالب مش بتلاقي الحاجة دي أو ساعتها مش بتعرف تلاقيها.
بتفضل مخنوق وتقلب في حاجات قديمة يمكن تلاقي طريقة تفرحك وبرضو متلاقيش تفتكر لحظات عدت وفاتت وناس كانت جوه حياتك.
بتشوف حاجات قدامك بتفكرك بذكريات قديمة بتوجعك فتفضل تفكر تفكر تفكر و برضو تفكيرك مش بيوصلك لحاجة.
وكل ماتفتكر لحظة حلوة تلاقي قصادها لحظات كتيرة بتضايقك وكل حياتك بتمر قدامك زي شريط العرض بس الأحزان فيه أكتر وأكتر.
بس ساعتها مابتحاولش حتى تخرج نفسك من اللي أنت فيه مجرد غرقان في هموم وحزن بيقضوا عليك.
ووسط الخنقة تبص حواليك مش لاقي غير قلمك وكراستك تجري عليهم تفكر تكتب إحساسك.
مابتقدرش تطلع كل اللي حاسه في الورق وجعك بيبقى أكبر من كل دا.
وبالصدفة تقلب في كراستك تلاقي كلام كتبته زمان إزاي تفرح وتفرح الناس حواليك وتقرأ وبكل اندهاش أنت اللي كاتبه في فترة عدت من حياتك.
تستغرب وتستغرب بس بتكمل قراءة وتيجي عند كلام أنت كاتبه بتوقف عنده أوي، وتفتكر اللحظة اللي كتبته فيها وتترسم على وشك ابتسامة خفيفة كأنها رسالة وصلتلك من السما.
تكمل قراءة والابتسامة تفضل على وشك وساعتها بيبدأ قلبك يرمي الهموم من جواه، وتفتكر أحلى لحظات حياتك أيام عشتها من غير هموم أيام برائتها لسه محفورة جواك بذكرياتها الحلوة واللعب مع الأصحاب.. تفتكر أيام اللعب في الشارع وأيام اللمة الحلوة مع أهلك وأصحابك تفتكر كل يوم عشته وضحكت فيه.
فجأة تتحول ابتسامتك لضحكة كبيرة وتقلب كمان في كراستك على حاجة من زمان وتلاقي ذكريات كنت كاتبها تلاقي كلامك انت وصاحبك كاتبينه وسط الحصة وتضحك أوي من قلبك.. كلام مكنش حد يفهمه غيركم أنتم وبس وتضحك أوي وتسمع صوت ضحكك فتضحك أكتر وصوتك يعلى أكتر لدرجة أن عينك تدمع من كتر الضحك.. وتنسى خنقتك وتسترجع كل لحظة حلوة عدت عليك وكأن الخنقة اتحذفت من قاموسك ودماغك ترجع تفرح والضحكة من قلبك تطلع والدنيا المملة الخنيقة حواليك فجأة اتنست وبقت ضحكة مسمعة كل البيت.
تلاقي كل اللي في البيت مستغربينك أنت قاعد تضحك ومحدش فاهم أنت بتضحك على إيه بس تحس أنك مبسوط.
حسيت أن الفرحة حلوة قولت أنا إيه اللي كنت عاملة في نفسي دا لازم أفرح لازم أضحك، وساعتها بس عرفت إن الفرح مش محتاج لا عربية جديدة ولا حب جديد ولا عيشة غنية، الفرحة بساطة وذكرى حلوة وسط كل الخنقة دي وإن أنت تقدر تخرج نفسك من كل اللي أنت فيه بمجرد أنك تفتكر حاجة فرحتك زمان عشان تشكر ربنا أنه فكرك وكان جنبك عشان يخرجك من خانة الحزن اللي جواك.. ماهو اللي بعتلك كراستك دي رسالة تفرحك وسط الخنقة.. قول الحمدلله أنت في نعمة غيرك يتمناها متنساش تفرح الفرحة ببلاش والعمر أكيد له نهاية وأكيد متحبش تقابل ربنا وأنت زعلان.. قول يارب أنا مبسوط بقربك مني وجنبي في كل حياتي.. يارب أنا فرحان.