تداول نشطاء موقع التواصل الاجتماعي “فيس بوك”، صورًا لبقايا جهاز قسطرة تم تدميره على يد أهل مريض توفاه الله بالمستشفى أثناء عمل قسطرة بالقلب.
وقد نالت هذه الواقعة استياء الكثيرين من رواد السوشيال ميديا، والذي كان في مقدمتهم الدكتور إيهاب فهمي الطبيب بمعهد القلب، فقال :” رفقا بالأطباء فاصبر لمرضك إذا أهنت طبيبا”، ثم كتب مرة أخرى:”طب الطوارىء أمن قومي لينتبه الجميع وإلا فالكل خاسر”.
وقال أدمن صفحة تجربة:”مريض حصلتله مضاعفات و اتوفى في القسطرة، أهله دخلوا كسروا أجدد و أغلى جهاز قسطرة في معهد القلب و يمكن في مصر كلها تمنه مليون ونص دولار”.
وطالب زيكو رمضان بـ:”يجب معاقبة من تعدى على قسطرة المعهد بأن يعامل كإرهابي ويحاكم كإرهابي، البلد فيها قانون”.
وتساءل آدم، أحد رواد السوشيال ميديا عن الأمن:”والأمن فين وإيه اللي يخلي أهل المريض في العمليات جنب الغرف، فعلا دا أحسن جهاز موجود في القسطرة”.
وبررت “كيفا فيشر” تصرف أهل المريض بأنه :”هو لسه في حد بيموت في عمل قسطرة، ده تخلف طبي.. دكتور يستاهل يتحاكم”.
كما برر محمد عادل ذلك أيضًا :”هو كله بيهجم ليه منحط نفسنا مكانهم مش يمكن اللي مات دة مات نتيجة خطأ طبي أو إهمال وده منتشر جدا”.
ورد أحمد علي عليهما، قائلًا :” في طب شرعي ونيابة.. الجهاز ذنبه إيه”.
وسخر وسام من تلك التبريرات، قائلًا :”خطأ طبي توصل إليه أقارب المريض اللي مش أطباء، إزاي يعني؟! و لو افترضنا كده تعاقب الطبيب و لا الأجهزة المملوكة للدولة، جهاز تمنه لايقل عن مليون ونصف دولار”.
وقالت ماني محيسن:”الجهاز مجاني و كان بيساعد في إنقاذ على الأقل 10 أرواح يومياً من الموت يعني أكتر من 3500 شخص سنوياً من جهاز واحد بس، يعني 3500 أسرة دلوقتي معرضة أنها تفقد حد منها بسب عجز في الأجهزة دي، معظم الناس مش مؤمنين بحاجة اسمها مضاعفات طبية عجز عنها البشر وحلها عند ربنا، دا راجل داخل يعمل عملية في قلبه في محاولة لإنقاذه من الموت مكنش داخل يغير على جرح مثلا !! معهد القلب مجاني بالمناسبة وحقق نجاحات خرافية علشان محدش يقول الدكاترة استغلتهم في الفلوس و أهملوا في المريض، و بفرض إنهم أهملوا، أهل المريض يدفعوا حق الجهاز الأول وبعدها يرفعوا قضيه وفي طب شرعي هيقول إن كانوا أهملوا أو لا والمحكمة هتحكم، لكن اللي حصل دا إيذاء لأرواح كتير ودا ميرضيش ربنا أبدا”.
واعتبر محمد علي أن العقاب يجب أن يكون:”ممكن أتخذ إجراء، وهو أنه مسلمهمش الجثة غير لما يدفعو التلفيات رغم أن اكرام الميت دفنه وهو مش سبب بس نعمل إيه لازم حل”.
جدير بالذكر أن صفحة أطباء مصر قد نشرت الخبر منذ حوالي ثلاث ساعات.