زمان لما كانوا يبقوا عايزين عيل صغير يرفع راسه علشان يتصور.. كانوا يقعدوا يبعتوا فيه و في كل اللي معاه ويقولوا له بص العصفورة فوق ..
طيب اشمعنى العصفورة يعني؟ ما فيه تسعين حاجة فوق نرفع راسنا و نبصلها .. طيارة .. سحابة ولا اي حاجة ..
العصفورة بقى طلعت – غالبًا – اهم حاجة محتاجين نبص عليها.. ربنا كمان طلب مننا نبص عليها.. هو عايزنا نرفع راسنا بس مش علشان نتصور .. لا .. علشان نبص علي الكائن الضعيف اللي ممكن تشيل ٢ منه بيد واحدة ..
العصفورة دي ربنا مهتم بيها وبيأكلها ويشربها ومهتم بعشها وولادها حتى!! و هي ولا الهوا .. مش شايلة هم اي حاجة !
قالنا لو انا مهتم بعصفورة و برزقها .. مش هعرف اهتم بيك و بكل تفاصيل حياتك؟
شايل الهم ليه يا انسان .. انت أفضل المخلوقات وأفضل من عصافير كثيرة !!
كل شوية يقولنا بصوا العصفورة .. واحنا ولاهنا .. في دوامة تانية!! يخبط لنا و يشاور علشان بس نرفع راسنا و برضه مافيش فايدة ..
بص علي العصفورة و بص علي حياتك ..ارفع رأسك..
و ابتسم علشان ربنا بيحبك .. وحاميك و محوط عليك..
ابتسم ..
وافضل مبتسم علشان صورتك تطلع حلوة .. وماتنساش كل شوية حتي لو مش هتتصور او تصور ما تنساش ترفع راسك لفوق ..للعصفورة ..
#تكفيك_نعمتي