مش عارفة انا لو كنت واقفة تحت الصليب وقت الصلب كنت هكون من اي فئة من الناس.. اللي بتنكر انها تعرف يسوع و واقفين بعيد يتفرجوا.. ولا اللي ما يعرفوهوش فعلاً.. ولا اللي مستنيين اي معجزة علشان يؤمنوا.. ولا اللي هربوا اصلاً من علي جبل الجلجثة واتبخروا!
ولا اللي مش فارق معاهم حد وواقفين بكل ثبات تحت رجليه.
مش هقدر اعرف طبعًا لأن الزمن غير الزمن.. بس اللي عارفاه ان نظرة عينيه دي خلتني متأكدة اني كنت هكون منهارة من العياط.. مهما كان موقعي حوالين الصليب..
دموع فرح علي حزن علي وجع قلب..
فرح انه احبني حتى المنتهى و هيموت علشاني..
حزن على نفسي و شقائي و خطاياي اللي شالها عني بدون ذنب ..
وجع قلب علي آلامه و دمه اللي سايل في كل حتة حواليه ..
عينيه مليانة حب على وجع على تسامح.. مليانة رحمة على ناس ما رحمتوش.
انا مكسوفة منك قوي يا رب ..
مش بس بسبب ضعفاتنا.. لكن كمان بسبب قسوة قلوبنا على بعض..
غمض عينيك عن الشر اللي جوانا يا رب.. استر على خطاينا و اذكرنا متي جئنا في ملكوتك.
انا مااستحقش كل الوجع اللي سببتهولك ده..
انا كان تكفيني نعمتك.. وتكفيني نظرتك دي..
نظرتك اللي قالت كل حاجة من غير ولا كلمة.
#تكفيك_نعمتي