وسط الأجواء المتشاحنة التي يعيشها المجتمع المصري، من حيث صعوبة إقامة علاقات عاطفية ناجحة بين الرجل والمرأة، تلاها ارتفاع في نسب الطلاق، فضلًا عن أزمة العنوسة بين الجنسين، طرحت سهام شعبان، الناشطة الفيسبوكية، تساؤلًا:”كل اللى ماتجوزوش عندي هنا يدخلو يكتبوا ليه ماتجوزوش لحد دلوقتي..؟.. وقد أهتم الكثيرين في التعبير عن آرائهم منها الناصحة والمهاجمة وأخرى التي تحمل أفكارًا جديدة على المجتمع المصري.
وكانت أبرز الأسباب :
-اديني سبب مقنع عشان أسيب شغلي و روقان دماغي وبيت الحج.. عايشة حياتي ملكة بعمل كل اللي نفسي فيه.. كفاية راحة البال.. اديني سبب عشان أسيب ده كله واتجوز.
– مش هاخد الخطوة دي دلوقتي، علشان بابا متوفي بقاله 16 سنة و ماما شافت كتير و عانت أكتر و لازم أشتغل عشان أعوضها عن اللي عاشته ده كله و أعيش حياتي و أعيشها مرتاحة باقي السنين اللي جاية.
-أسباب اقتصادية بحتة..ليه أبهدل الناس معايا.. ده غير إن أي صاحب شغل بيعرف إن اللي شغال عنده متجوزة بيتعمد إذلاله عشان عارف هيستحمل عشان عياله وبيته.
-لقب رجولة مبقاش سهل التنفيذ من ناحية الشباب.
-مقدرش أتجوز غير عن حب، مش متقبلة أني ممكن أتجوز صالونات.
-ملقتش الراجل المحترم اللي يكون أب لاولادي.
-عشان الجواز دا حاجة مش زي أكلة أو خروجة دا إنسان بتتفق معاه أنه يشاركك كل لحظات حياتك يكون أقرب الناس ليك.
-السوشيال ميديا الانفتاح غير الطبيعى اللي شباب والبنات بقوا فيه، بيشوف وبيقارن وبيطمع وكل حاجة بقت متاحة بالنسبالك يبقي ليه يفكروا في الاستقرار ويبلوا نفسهم بمسئوليات.
-علشان يشبع غريزة لا أكتر ولا أقل ده غير إن أهلي لو حد اتقدم بتهان عشان أقبله عافية.
-أغلب اللي عاشوا تجارب قاسية وسط الأب والأم دماغهم بتبقى ناشفة من ناحية الجواز والارتباط.
– كل يوم خوفي وقلقي وترددي من الخطوه دي بيزيد، ودا لأني مش عارفه أختار.
-مكسلة الصراحة، يعني إيه أصحى 6 الصبح أحضر الحمام والهدوم والفطار وبعد ما ينزل أروق البيت واغسل المواعين وأحضر للغدا واستناه لما يجي و نتغدي وأشيل صحون واغسل وهلم جرا.
-كان نفسي اتجوز حد بحبه وبيحبني.. بس بعد ما وصلت لـ36 سنة لاقيتني بتردد أكتر يمكن الحاجات اللي في الحياة شغلي وحاجات بعلمها لتحقيق أحلام وبزنس خاص بحسها استحوذت على اهتمامي أكتر.
-عندنا ثقافة الجواز علشان ميتقلش على الواحدة عانس لكن مبيفكروش في أيه اللي هيحصل لما يتجوزوا هل وصلوا للنضج الكافي؟ هل هيعرفوا يربوا عيال و لا هيبقوا بس زيادة عدد.
-علشان مفيش حد بقي مستوعب يعني إيه جواز و بيت و عيلة جديدة و لو لقيتي حد مستوعب هتلاقيه مستوعبها زيادة يعني شايف نفسه أب من أبو نضارة و جرنال و مراته ست بيت بالمريلة، و ينسى أنها كانت حبيبته اللي المفروض ليها حقوق عليه والبنوتة اللي جواها بيموتها.
-علشان الزواج عندى احتواء ومشاعر وحب وروح وحياه وللأسف كل اللى بيمر في حياتي بيكون ذو مصلحة ولا يريد الشخص الفقير إلى الله.
-علشان ملقتش راجل بجد يحبني زي ما ـنا مش محتاجة أعمل مجهود عشان أعجبه ويخاف ربنا بجد مش كلام وخلاص، ده غير أني أبقى حبيبة بجد.
-مش قادرة أقتنع أني هعيش مع حد 30 او 40 سنة وأنا بزهق لو قعدت مع أختي نص ساعة على بعض.
-لأن الجواز قرار لازم ناخده وإحنا مش فاهمين أي حاجة، لكن لما تفهم اللي حواليك و تنضج بالشكل الكافي صعب جدا تتجوز.
-لأن الست تقدر تنجح من غير أي راجل جمبها.
-علشان صعب ـجيب عيال في مصر يعيشوا نفس القرف اللي بنعيشه مش جايلي قلب أظلمهم.
-لسا صغيرة يعتبر 20 سنة , مش جاهزة للجواز مسئوولية و أنا لسا تافهة.
-علشان ملقيتش نصي الثاني اللي يتوافق مع أفكاري ويشدني.
-متجوزتش تاني يقينا بالله أنه مشروع فاشل ومعرفتش كده إلا بعدين بس الحمد دخلت التجربة دي واتعلمت منها كتير ودرس عمري كله.
-لأني مش عاوزة جوازة والسلام، مش عاوزة إسقاط لقب انسة لمدام بس، الجواز عندى اضافة مش اكل وشرب ورجل تحصيل حاصل.
-بعالج نفسي الأول من أمراض العصر.. علشان ماظلمهاش معايا.. كفاية ظلمت كتير.
-مبقاش في طاقه نحب و نقعد نضحي ونجيب في دباديب علشان ناس مبتحسش.
-كل يوم بيعدي بخاف من الجواز أكثر من اليوم اللي قبله، لما اتغلب ع الخوف دا هبقى أقرر.
-راحة البال مش ناقصین وجع دماغ دا غیر أننا مش فاهمین نفسنا یبقى هنجیب حد نفهمه إزاي.
-البنات علشان مجلهاش عريس أما مناسب أو علشان مجاش أصلا غير كدا هتلاقيها بتحور على نفسها وعلى الناس.
-اختلاف وجهات النظر بين الجيل الجديد و القديم في كل حاجه اولهم حق تقرير المصير اللى مازالوا بيحاولوا يحتفظوا بيه في ايديهم.
-البنات بقى خلقها ضيق أوي غير أني كل ما أحوش 10000جنيه جمعية، التضخم يزيد ومصاريفي تزيد فارجع تاني للصفر، 8 سنين على الحال دا.
-عشان عايش في قلبي ذكريات زمن الحب الجميل بقي صعب نحب بسهولة في هذا الزمن المتقلب بكل معاني قصص الحب المزيفة.
-الأسلوب المتبع للجواز أسلوب فاشل و أنا برفضه بشدة.
-الحلال بقى صعب أوي.. و الحرام بقى بلاش. وعلشان أشقى شاب يبحث عن أتقى بنت.