من الأمور الطبيعية الضرورية بعد الولادة، هي قطع الحبل السُري اللي بيربط الأم بالطفل اللي توه خارج للدنيا .. بعد ماكان معتمد عليها في كل حاجة، آن الآوان إنه يعتمد على نفسه .. أول ماينزل كمان وبعد مايقطعوا الحبل ده، يقلبوه فوقاني تحتاني ويخبطوه على ظهره علشان يبدأ يتنفس لوحده .. آه صحيح وهو بيبي، بيوكلوه ويشربوه ويعملوا له كل احتياجاته، بس ماحدش يقدر يتنفس له .. وشوية شوية بيكبر ويعتمد على نفسه في الأمور الحياتية دي .. بس بييجي وقت في حياة كل إنسان الروحية، بيبدأ يشعر باحتياج إنه يرتبط بقوة تاني أكبر منه .. يستمد منها النَفَس اللي بدأ يتقطع .. بقوة تمده بالحياة .. تمده بالغذا .. تمده بالمياه .. وتضخ فيه الدم الجديد اللي بيساعده يحيا ويتحرك ويوجد .
وكأن الإنسان بيمد إيده ويربط روحه بروح ابوه السماوي برباط الروح القدس .. وكأنه بيمد حبل سُري روحي بارادته يرجعه لمصدر الحياة .. ويلاقي روح معونة عجيب بدأ يتضخ جواه .. أصل الروح ده “يعين ضعفاتنا” .. والرائع، إن كل إنسان يملك إنه يعمل كده .. مفيش قوة على وجه الأرض تقدر تقطع الحبل ده مهما حاولت .. ومفيش حياة تنفع تكمل بدونه .. “لأننا به نحيا ونتحرك ونوجد” أعمال ١٧: ٢٨