اعتقد ان الحكومة الحالية تنفذ سلسلة محددة من سلاسل تحرير السوق تنفيذا لروشتة صندوق النقد الدولى، تنفذها بأسلوب الصدمة والترويع الأمريكانى زى ليلة سقوط بغداد حتى لاتتكون معارضات جدية منظمة للتغييرات القاسية اقتصاديا واجتماعيا قبل ان تتم تلك الاجراءات بنظام مش حتقدر تغمض عنيك واوعى تغير المحطة، وقوات الدفاع الالكترونى مجهزة بنفس الخطط والأساليب ان هناك مؤامره كونية لإسقاط مصر.
لكن الحقيقه ماتعرفش مين اطراف المؤامره أمريكا ولااسرائيل ولاقطر ولاتركيا ولااثيوبيا، ومش مهم تعرف لان دى أسرار أمنيه عليا وحضرتك حشر انفك فيما لاتعرف ممكن يبوظ الطبخة، خليك خفيف اولم تؤمن طيب ممكن تتفيقه على الحكومة وتقول أمنت ولكن ليطمئن قلبى حضرتك ساعتها ممكن تلاقى مصيرك زى مصير سائق الكارو المسكين مكين في الاميرية حيث تسببت سكتة قلبية مجهولة في تمزيق كل مخارج ومداخل جسمه، واسالت الدم منها ده غير سياط التعذيب النفسى الناتج عن عدم الايمان بنظرية المؤامره الغامضه اللى حتترك اثر على جسدك كله اصل انت عارف الزعل وحش يافندم والحزن في القلب لامؤاخذة زى عضة الكلب واللى قبلنا خدوا ايه اخرها ايه يعنى قطنة !!..اوعى تجيب كمان سيرة القطنه والشاش والحاجات دى لانها ممكن جدا تكون كلمة سر الليل للمؤامرة الصهيو أمريكية القطرية التركية المشتركة تخرج بعدها الخلايا الماسونية النايمة ونبقى زى سوريا وليبيا ، انت شايف منى مينا قالت سرنجه راحت في الكازوزه يامؤمن مافيش حاجة في المتسابه تحرير السوق سلسلة متجهز فيها فقرة تحرير سوق الخدمات الطبيه زى خدمات الدواء والصحه العامة للمصريين اى ناس في مقام أمين عام نقابة الاطباء يشكل عقبه للخطه لازم تتحرر من موقعها لاتندهش ابدا عندما ترى التوجيه المعنوى ثم ترى الجحاف الالكترونية تجرى بسرعه نحو الضحيه المقصوده لتنهش اسنانها الحاده المسمومه في جسد الضحيه كلمة السر سرنجة او قطنة اى كلمات عابره ممكن تتسبب في اغتيالك معنويا بنظام وكمان بتقولى صباح الخير ..