كتب نيافة الانبا مارتيروس اسقف عام شرق السكة الحديد ، رسالة تشجيعة لابناء المرحلتين الإعدادية والثانوية على موقع التواصل الاجتماعي Facebook قال فيها الآتي : حبايبي إعدادي وثانوي ، معرفش ليه السنة دي الولاد مشعجبها المدارس ، يمكن من كتر مابيسمعوا فى وسائل الإعلام إن التعليم هيتصلح وبعدين راحوا المدرسة لقوا العصيان مستنياهم من أول يوم ..هههههه .. والتهديد والوعيد .. المهم إنتوا إتحملوا شوية وركزوا في المذاكرة وأجازة نصف العام جاية ، تعالوا بأه أقولكم كلام حقيقي ،
لو وقفت قدام المراية هتلاقي نفسك وسيم جدآ !!بجد ، ومفتول العضلات كمان !! بجد .. ماعرفش بأه إذا كنت بتلعب رياضة ولا لأ ؟ ؟ ؟ عامة لو مش بتلعب رياضة أو تمارين هتكبر وتروح الجامعة وشكلك راجل عجوز .. ضهرك محني .. كأنك هتتنيح قريب !! هههههه.. بابا يسوع كان بيحب المشي .. وكان بيحب يطلع الجبال العالية ..وبيحب الهواء الطلق !!… يالا إلعب رياضة .. وإلعب تمارين .. علشان جسمك يطلع عدل .. زي الألف .. وتبقي مفتول العضلات .. وقوي .. متهنجش زي الكومبيوتر .. ولو روحت الجيم خد بالك ياصاحبي من الحاجات الخطرة إللي بيدوها للولاد العبيطة .. إكفينا شرها الحاجات دي .. إنت ماتخدش إي حاجة في الجيم .. وأحلى حاجة إنك تروح البيت بعد الجيم وتشرب 2 كوب مياه علشان تغسل كل أجهزة جسمك كالكبد والكلي والبنكرياس وتتخلص من الدهون والأملاح الزيادة والأمر دا صحي جدآ ..
خليك واد ناصح مفيش حد يضحك عليك .. ولو جيت بأه وعملت بصوتك كده .. إحم إحم .. هتلاقي صوتك إتغير شوية بعد ماكنت طفل صغير .. وبأه صوتك أجمل .. رخيم !! علشان كده تلاقي أكبر عدد كورال هو كورال إعدادي لأن صوتهم مميز وجميل .. حاول تحافظ علي صوتك .. كنت مرة بأتمشي مع الخادم بتاعي أتذكره بكل الخير .. وأنا في تانية إعدادي وكنا متعودين نقول ترانيم وإحنا بنتمشي وبعدين كان بيحب يسمعني وأنا بأرنم .. و لما أقوله مقدمة الإنجيل .. وبعدين قولت له أنا حاسس إن صوتي مش حلو !! قالي إزاي ؟ ؟ دا صوتك جميل .. دا أنا بحب أسمعك .. وبعد سنتين كده صوتك هيكون أحسن كمان .. ويتعدل جامد .. لأنك إنت دلوقتي في سن المراهقة .. بس برضه صوتك حلو !! …. أنا أعجبت أوي بكلامه وفاكره لغاية دلوقت .. هو دلوقت عايش في أمريكا في مدينة جيرسي سيتي وإسمه المهندس مجدي سويحة .. بأقوله مساء الخير …