أنا اصلا لسه معرفتوش ..
وهدوقه منين وانا كـُلي حنين
للي انا اصلا..
لسه ما دوقتوش ؟
انا باجري ورا كل الافكار
يمكن علشان القاني فيهم
تحدفني يمين ترميني شمال
يسرحوا بيا واسرح فيهم
وبادوق انا من كل الطبخات
وباشوف ايه الناس بيغذيهم
طب كل ده ليه ؟
علشان عقلي محتاج يملا
علشان قلبي يشبع بيهم؟
وياريته بيشبع في الآخر
من كتر اللف يجيب آخر
يرجع محتاج للراحة يومين
ويومين في يومين..
يرجع للجوع زي الاول
ويفكر يبدأ م الأول
مع انه داق طعم الآخر ..
وساعات بارجع وألوم نفسي
انا ليه اصلا اصلا بجري ..
مادُمت بلفلف ع الفاضي
ومدام الجوع دايما اخري
انسان ..
جعان ..
لحاجات ياما
مابيتعلمش ..
قالوا اللي يعيد
تسديد ف ” لا شئ ” ..
لساه مافهمش
بتجوع وتجوع ..
مش ده الموضوع
انما بتروح على ايه يملاك ؟
فيه حاجه وراك علطول شدّاك
ومجرجره فيك الجوع جواك
فاكر نفسك شبعان جوه
وانت اتاريك لساك بـرّاك
مهما بتسد الجوع بتجوع ..
وتروح للطعم فيجري وراك
اتارينا زينا زي الناس..
و أهو ده بالتحديد الموضوع
سايبين الطبخة اللي تشبّـع
والحضن اللي مافيهش مواجع
وبنحلم بس ندوق ليومين..
من بني آدمين زينا جعانيين
فنلاقي الجوع راجع راجع
بيتر ناجي [email protected]