يارب ياللي حِسبتك بالمسطره
.. ليه مسرحك اغلب ما فيه
معازيم ورا ؟!
وحبة قاعدين صف أول مهمومين ..
وحبة واخدين جنب واحد..ملمومين
وحبة عايشين المشاهد مكتوفين
وناس بعيده منتوَره ؟
وحبة دايرين يسألوا
وحبة خايفين يفشلوا
.. وحبة عارفين الطريق بس غاويين مشوره
وحبة زاهدين كـــل شيئ
ومركزين فوق مسرحك..
واتقال عليهم انهم..
مرصوصين للمنظره
وحبة تانيين بين بينين ..
وغيرهم اللي مروحين
لمكان جديد بينادوا بيه
قالوا المكان ده مطرحك ؟
ودقون بتغواها المنابر
وناس بسيطة بتشرحك !
وحد قاعد فيها عابر
يادوب مأجر التذاكر
وناس تغير ف الاماكن
وناس مكانها لسه ساكن
وحبة رِضيوا بما جرى
وحبة باعوا فيها لكن ..
دفعوا نصها سمسره
وناس عليهم يضحكوا
وناس يعيشوا يشتكوا
م الزحمة ومن الثرثرة
عايزين يقابلوا نفسهم
ويلاقوا مين فين ؟ زيهم
والدوشة لسه مسيطره
. يارب ياللي حــسبتَك بالمسطره
مين اللي صح ؟
وفين مكاني
.. بين ألوف متبعتره ؟