يـا سارح فيك أنا وناسي..
هموم الدنيا والأيام..
يا أحلى كلام بقولهولك
باعتهولك بـريد قلبى ف نهاية العام ..
يا صوت طبطب على جرحي
وطول العام تفرّحنى..
بعيد عنّـك بأكون مَحني..
وأنا ف قـُربَـك بتلمحني
عناية ايدك الحانية ..
اللي بتعضض شقوق ضعفي
بفضفض ليك .. ومستنيك ..
تمد إيديك وتلمسني ..
وتشفي قلبي من يأسي
وتسبينى.. تحسسني
بسحر وجودك الدافي
وترفع عنى..
حمل تقيل على اكتافي مكتـفني
ورافع إيدي ليك أشكي..
وأقول وأبكي ..
واصمم إن انا هآخد..
بركتى من ايديك وأحكي..
لكل الناس على سلامك..
فى وشي يشوفوا اسراري وأسرارك
وأنا وانت لوحدينا ف مخدعنا
وننسى الكون..
وننسى الناس فـكُله يهون..
وأوضتى كبيرة وتسعْـنا
ونحكى كلام يشبّعنى
وكله بدون ما أي ودان هتسمعنا..
أنا مسجون فى دنياهم وأنا معاهم..
ومتحرر وأنا وياك فى مخدعنا.. نهاية العام
وطول العام بأقول واسمع
يجيني كلام يفرحني ..
على أخبار بتوجعني
ومش بأرجع..
لحالتي الأولى إلا اما ..
اكلِّـم عينك الحلوة نهاية العام
أنا سابح فى أنهارك يا راوينى..
وسايح فى دفا حبك يدفيني..
وسارح فيك ومش شارح لإحساسي..
ومش سعفاني ألفاظـي..
وأنفاسي بتِطْلع واحدة والتانية
تزيد حمدك.. مدى الأيام..
إليك قلبي .. وأشواقي
وأعذاري
وأخطائي..
وافراحي..
وأفكاري وأحلامي
وأمراضي واصنامي ..
كُــــــله بين ايدين قلبك
وإهدائي إليك مكتوب..
بأقولك ان انا دايب ، ف حبك دوووب
بخط عريض بأقولك فيه ساعدني أتوب..
وأشعاري لفيض حٌبك..
بتغزل توب دروب حضنك
فباستقبل شبع منك ..
فتشبع كل اشواقي ..
وتسجدلك على فضلك
ولسه كلام كتير باقي ..
وبواقي هياااااام
مؤجل لما نتقابل ..
انا وانت لوحدينا نهاية العام ..