فاكرين في الحَـر بنعمل ايه؟
بنحط طاقيـّه على روسنا
وندور على اقرب ضله
علشان تحمينا من اللسعه
مع ان فيه ناس تانين عايشه
من غير ضُليله بتحميهم
ولا بيت في الشتا بيدفيهم
وفُـتات أكلنا بيكفيهم..
ووجعهم بيلطّش فيهم..
فيه حد بيسمعهم منـا ؟
شايفينهم بني آدمين غيرنا
وإذا كنا بنتأذي من نظرة
كام نظره بتجرح معالمهم
وتشوه فيهم معانيهم..
كام مرة عيوننا بتقـتلهم ؟..
من عين الناس مين يحميهم ؟
والادهى اننا بنسميهم..
مساكين !
تايهين احنا واحنا المساكين
واقفين نتفرج من ناصيه
وبنتصعب على سوء حالهم
اتارينا احنا المساكين عنهم
واتاريه كان تمرين لوشوشنا..
على قُـدرة تغيير ملامحنا
واتارينا بنجرحنا زياده
واتاريها بتفضحنا العاده
بنبص عليهم من برا
وجوانا..
بنعبُدنا عباده
ونبيع الكون علشان روحنا
مساكين احنا..