– احكي يا مريم
آخر منظر قبل الحادثة…
– كان قلبي م الفرحه بيرقص
كنت أنا لابسه فستان أبيض
كنت الأسعد بين الزفة..
كنت الاجمل.. كنت الاحلى
– كنتي ساعتها حاسة وعارفة؟
– لأا ماكُنتش ، انما شايفة
– شايفة الجاني ؟
– شايفة ملايكة
شايفة السما فرحانة وقايدة
– طب والزفه ؟
– طلعت زفه ع السما رايحه
– اسف على مشاعرنا السارحه
قتلوا الفرحه
والتانيين..
قالوا بيحموا
انما طلعت نكته وبايخه
انتى الحق وكله شكوك
ورده ونبتت بين الشوك..
يد غريق بتعافر موج..
حلم غريب ومكانك فوق..
ياللي انتي شمس..
ونور شروق
خلي السما تيجي..
على أرضنا الضلمه
تشفي المرض بيكي
يا مريم الغنوه
يا مريم الخضرا..
يا حب كاشف في السواد خوفه
يا نور في طيفه السما ساكنه
اطـمّني.. لسه السما عادله
والنور مالوش هُـدنه
لسه السما حاضنه..
مهما يهون موتنا
لسه الطريق أميال
والخطوة مش راعشه..
مع ان شوفي اخدنا كام خطوة
..لسانا ماوصلناش!
لكن بدمك اوعدك ..
كل اللي جاي يتعاش
والحلم مش ببلاش
ضمي الرصاصة لحضنك الدافي
يمكن رصاصهم يتـكسف يقتل..
يا أحلى بنوته.. دمك على اكتافي
شايلُه عشان الحب بيه يغزِل
يا عيون بتضحك والرصاص خانها
انتي اللي فيكي الطيبه ومكانها
والعيبه ع اللي قال .. بيحمونا
كل اللي قالوا سلموا بابها..
ولأنه اقوى م الكلام ضحكتِك
ولأن وصفك لخصُه صوره
وعشان مافيش من عندنا أموات
صورتك يامريم جوانا محفورة