* الامتحانات جاية تقيلة ولا كأن التيرم كان مهزوز من إنفلونزا الخنازير والخوف منها.
طالب جامعي
* السنة إللي فاتت جاوبت كويس وسقطت, وإللي جنبي كتب اسمه بس وجاب جيد جدا في إحدي المواد… طب أعمل زيه السنة دي؟.
طالب حقوق
* اهتموا بمناطق زي شرم الشيخ وسابونا في الشوارع من غير ما يسألوا فينا غير ببطانية وأكل… طب وفين الحل لمشكلتنا؟.
مواطن من أبو صويرة
* لما الدولة عارفة أن مناطقنا دي متعرضة للدمار من السيول سمحوا لنا بالبناء فيها ليه من الأول؟!.
سيدة من أسوان
* أحسن حاجة فعلا في ماتش زي مصر والجزائر إن المشجعين يكونوا من روابط المشجعين في الأندية المختلفة وليس من عامة الشعب عشان المشاحنات.
معلق رياضي
* طب كانوا قالوا لنا إن السيل جاي كنا عملنا حسابنا, وخدنا الحاجات المهمة من بيوتنا.
سيدة من العريش
* إحنا بنقبض كان يعني عشان يخصموا مننا ويمنعوا عننا رواتبنا… ناس تاخد ملايين وعينهم علي إللي بياخدوا ملاليم.
عامل في كتان طنطا
* سمعنا إن الأسعار هاتعلا تاني… طب إزاي؟, وليه؟ وهيزودوا مرتبباتنا ولا لأ؟. إحنا خلاص عقلنا هايضرب مننا.
موظفة
* ماعملتش أي حاجة زيادة في بيتي إللي عبارة عن أوضه وصالة ولقيت فاتورة الكهرباء جاية 600 جنيه!!.
مواطن من عزبة النخل
* هي وزارة الكهرباء رفعت الفواتير وكمان سايبة بتوع القمامة يتحكموا فينا ما يرضوش يطلعوا ياخدوا أكياس القمامة مننا لازم يكون فيه وقفة لبتوع الكهرباء.
موظف
* مش عارفين نصطاد, السمك كله مات في البحيرة بسبب الصرف الصحي والزراعي والصناعي حسب ما سمعنا.
صياد
* * تعليقا علي نفوق أعداد هائلة من الأسماك في بحيرة مريوط بسبب اختلاط الملوثات بالبحيرة.