قرب واشتري المواطنة
* قرب تعالي اشتري يا مواطن, مواطنة حلوة وجميلة حسب أقوال الفهيمة لكنها عاوزة الأكيلة, المواطنة في بلدنا ببلاش لكن عايزة التفعيلة ومين يفعلها ومين يشتريها؟!.
أصل المواطنة عند الخالة فاطنة ماهي خبيرة في المواطنة لكن باين عليها كبرت وعاوزة إللي يساعدها وياخد بأيديها.
ومحمود وجرجس عمرهم ماهايدوقوا المواطنة وتعجبهم إلا لما تعملها لهم الخالة فاطنة بإيديها الحلوة.
عرفتي يا حكومة مين هي الخالة فاطنة؟!!. طب وأنت يا محمود وأنت يا جرجس تعرفوا إيه عن المواطنة؟!!!.
هذه تساؤلات وتمنيات وآراء من الشارع المصري ربما تنظر إليها الخالة فاطنة قصدي الحكومة لعل يصل لها صوت محمود وجرجس أقصدي الشعب.
* بالذمة بيتكلموا عن المواطنة وكل دي أحداث طائفية!!.
محاسب
* المواطنة يعني تحب وطنك.
صاحب محل
* المهم وطني يحبني الأول.
عامل في مقهي
* الحزب الوطني بقالوا قد إيه بيتكلم عن المواطنة شوفنا حاجة قدام عينينا تقول إن المواطنة بقت حياة معاشة؟!.
محامي
* بعد كل حادثة طائفية شيخ يبوس كاهن وكاهن يبوس شيخ ونقول وحدة وطنية ومحبة هي دي بقي المواطنة؟!!.
موظف علي المعاش
* والله لو كل واحد خللا إيمانه بينه وبين ربنا إللي هيحاسب الجميع, هانعيش المواطنة من غير ما نحس ونحكي عنها.
موظفة
* كلمة المواطنة عاملة زي أفديكي بروحي ودمي يا مصر, كلام حافظينه ومش فاهمينه.
شاعر مبتدئ
* المواطنة بتتباع في كتب علي رصيف الشارع المصري حد بيشتريها ويقراها ويفعلها؟!.
محامية
* مين هي المواطنة دي… مرض جديد زي إنفلونزا الخنازير هيصيب الوطن ولا إيه؟!!.
عامل نظافة
* هما قانونين في مجلس الشعب لو تمرروا في دقايق هايحسسونا بالمواطنة.
إعلامي