** قبل أي انتخابات يتحدث كل واحد منا مع ذاته ليري سيذهب لينتخب من يمثل دائرته؟ فأحيانا نختار المرشح الذي نعرفه وإللي نعرفه أحسن من إللي مانعرفوش, وأحيانا نختار المرشح الجديد لأملنا في التغيير لعله يقدم شيئا لأحيائنا السكنية والمواطنين, وأحيانآ نقف مكتوفي الأيدي لا نعلم ما تخفيه اللافتات الإعلانية وراءها.. فأنت واحد من الشارع المصري لك رأيك وقلمك الذي تقول به نعم لهذا أو لذلك.. فهذا رصد من الشارع المصري منهم المتحمس ومنهم من له آراء أخري.. فعندما سألناهم عن المرشح المنتظر بالنسبة لهم.. قالوا:
* بصراحةأنا ناوي أسأل أكثر ناس خبرة في منطقتي عن المرشح السابق عمل إيه وبناء عليه أشوف هنختاره تاني ولا لأ.
مواطن من عزبة النخل
* لو مالقتش المرشح بيلف بنفسه يعرف الناس بيه وينزل لمستوي كل أهل الدايرة.. مش هننتخبه.
محاسب
* هاراقب الدورة إللي جاية إيه إللي هايعمله المرشح الجديد ولو مالقتش جديد مش هننتخب حد تاني وده قرار لا رجعة فيه.
مدرس
* إللي يحل لنا أزمة قطع الميه والكهرباء.. هو إللي يستحق إنه يبقي نائب عن دايرتنا.
حلاق من الخصوص بالقيوبية
* إللي يلم شوية بلطجية يعبروا عنه مايستحقش ننتخبه.
موظفة
* في مرة استضافوا في الفضائيات نائب حاله بسيط لأنه بيخدم دايرته بكل مليم بيتصرف له وعشان كدة كان حاجة مختلفة واستضافوه, ده معناه إن كل النواب, الفلوس بتعمي عنيهم عن دورهم كما ينبغي.
مدرس موسيقي
* وأنا علي بإيه أروح أتبهدل يوم الانتخابات في اللجان وقلة التنظيم وكأني رايح أخذ شنطة رمضان.. بلا وجع قلب.
بائع متجول
* مش هاننتخب حد وخلاص.. لأني مش واثق في حد وقالك الفلوس بتغير النفوس.
شاب ليسانس حقوق
* لو فيه رقابة علي النائب في دايرته عن طبيعة عمله وخدماته إللي بيقدمها كنت أنتخب حد.
صاحب محل ألبان